Ҳар биримиз соғлом уйқунинг муҳим аҳамиятга эга эканлигини яхши биламиз. Уйқу жараёнини соғлом ва сифатли қилиш учун нималар қила оламиз? Чойшабни тўғри танлай оламизми? Қуйида ширин уйқу учун қулай чойшаб танлашда нималарга аҳамият қаратиш лозимлигини ҳикоя қиламиз.
Чойшаб харид қилиш учун йўл олар экансиз, албатта унинг ўлчамларини олдиндан аниқлаб олишингиз зарур. Чунки ҳозирги «стандарт» ўлчамларга ишониб бўлмайди. Шунингдек, мато ювилгандан сўнг киришиши мумкинлигини ҳисобга олинг. Сифатли чойшабда бу унчалик сезилмаса ҳам, бичиш қоидаларига риоя этилмаган чойшаб ўлчамининг 15 фоизини йўқотиши мумкин. Шунинг учун сифатсиз товарни қайтариш мумкин бўлган махсус савдо муассасаларидан харид қилишни тавсия этамиз.
Чойшаб танлашдаги иккинчи муҳим қоида — фақат табиий матоларни танлаймиз! Чойшаб учун танланган мато ҳавони албатта яхши ўтказиши ва намликни юта олиши зарур. Бундан ташқари, у бир неча марта ювгандан кейин чўзилиб кетмайдиган сифатли матодан тикилган бўлиши лозим.
Пахта ёки хомсурп чойшаб комплекти қимматлик ҳам қилмайди, юқоридаги талабларга ҳам жавоб беради. Сатин эса қўшимча эстетик жиҳатларга эга. У чиройлироқ кўриниш билан бирга, бадан учун ёқимли ва камроқ ғижимланади.
Ипак чойшаб нафислигидан ташқари тери ва сочлар учун фойдали ҳамдир. Бироқ ёзнинг иссиқ кунларида майин салқинлик берган ипак матода қиш кунлари музлаб қолиш ҳам ҳеч гапмас.
Чойшаб рангига келсак, у ҳар бир кишининг дидига боғлиқ. Қулайлик жиҳатидан уларнинг бир рангдагисини танлашни тавсия этамиз. Сифатли матонинг ранги ҳар иккала томонида ҳам деярли бир хил бўлади.
Шунингдек, харид қилишдан аввал чойшаб ишлаб чиқарувчиси, ишлаб чиқарилган сана ва маҳсулот таркиби кўрсатилган маркировкаси мавжудлигини текширинг. Чокларнинг сифати ва иплар ранги мослигини ҳам текширишни ёддан чиқарманг.
Изоҳ (0)