Туркманистонда президент сайлови арафасида ташвиқот кампанияси якунланди

Туркманистон президентлигига сайловлар бўйича сайлов кампаниясида ташвиқот даври 12 февралга белгиланган сайловдан бир кун олдин якунланди, деб ёзади «ТАСС».

Республиканинг сайлов кодексига мувофиқ, «ташвиқот номзод рўйхатга олинган кундан бошланиб, сайлов кунигача бир кеча-кундуз қолганида тугалланади». Шу билан бирга, қонунчиликка кўра, «бунгача сайлов комиссияси биносидан ташқарига жойлаштирилган» ташвиқот хусусиятига эга босма материаллар (варақалар, плакатлар ва бошқалар) ўз жойларида қолиши мумкин.

Нашр эслатишича, Туркманистоннинг сайловлар ва референдумлар ўтказиш бўйича марказий комиссияси ўтган йилнинг декабрида президент лавозимига тўққиз нафар номзодни рўйхатга олган эди, уларнинг уч нафари сиёсий партиялардан, олти нафари эса ташаббускор гуруҳлар томонидан илгари сурилган.

Амалдаги президент Гурбангули Бердимуҳамедов демократик партия вакили сифатида сайловда қатнашади.