Россиянинг Олтой ўлкасида қаҳратон совуқда қолдириб кетилган икки ёшли боланинг ҳаётини ит сақлаб қолди, деб ёзади «РИА Новости» ўлка прокуратурасига таяниб.
Январь ойида маҳаллий фуқаро ўғлини иситилмайдиган верандада озуқа ва кийимсиз ҳолда қолдириб, уйидан кетган. Болакай уни ўз танаси билан иситган ит туфайлигина тирик қолган.
Музлаб қолаётган болани бегона одам тасодифан кўриб қолган. Айни пайтда шифокорлар тана ҳарорати тушиб кетган болага ёрдам кўрсатмоқда. У совуқда қанча вақт қолиб кетгани номаълум.
Она боласини топиб олганларидан кейин тўрт кун ўтиб, уйга қайтиб келди. Аёлга нисбатан жиноий иш қўзғатилди, уни оналик ҳуқуқидан маҳрум этиш масаласи кўтарилди.