Туркия Қуролли кучлари Бош штабининг маълум қилишича, 9 февраль куни Сурияда рус авиазарбаси оқибатида ҳалок бўлган туркиялик ҳарбийларнинг жойлашуви координаталари ҳақидаги маълумот Россия ихтиёрида бўлган. Бу ҳақда Meduza хабар бермоқда.
Бош штаб баёнотига кўра, ҳалок бўлган ҳарбийлар 10 кундан бери бир бино ичида бўлган; икки мамлакат ҳарбийлари кейинги бир ой ичида кўнгилсиз ҳодисалар олдини олиш мақсадида координаталарни алмашган эди.
9 февраль куни тонгда Суриянинг Ал-Боб шаҳри яқинида Россия авиацияси томонидан берилган авиазарба оқибатида туркиялик уч ҳарбий ҳалок бўлди, 11 нафари тан жароҳати олди.
Россия томони авиазарбани беришда Туркиядан олган координаталарига асосланганини маълум қилган; Россия Мудофаа вазирлигидаги манбаларнинг «Коммерсантъ»га маълум қилишича, бомбалар икки мамлакат томонидан аввалдан келишилган нуқтага ташланган, бу квадратда туркиялик ҳарбийлар бўлмаслиги лозим эди.
Россия президенти Владимир Путин юз берган ҳодиса муносабати билан Туркия раҳбари Ражаб Тоййиб Эрдўғонга ҳамдардлик билдирган.
Ал-Боб шаҳри айни вақтда ИШИД назорати остида қолмоқда. Шаҳардан жанубдаги ҳудудларни Россия кўмагидаги Сурия ҳукумат кучлари, шимолидаги ерларни эса суриялик исёнчилар ва Туркия эгаллаган. Январь ойида Россия Сурия ҳудудида илк бор Туркия билан ҳамкорликда қўшма операция ўтказишини эълон қилган эди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)