АҚШ банклари 120 млрд доллардан ортиқ захира маблағи тўплагани маълум қилинди

2008–2009 йиллардаги молиявий инқироздан сўнг капитал захирасини яратиш талаби қўйилган АҚШдаги йирик банклар 120 миллиард доллардан ортиқ маблағ тўплашга эришди. Бу ҳақда «Коммерсантъ» хабар бермоқда.

29,1 миллиард доллар миқдоридаги энг катта захира капиталига Citigroup банки эга. Bank of America ва JPMorgan Chase тўплаган сумма тегишли равишда 21,2 ва 19,7 миллиард долларни ташкил этади.

АҚШдаги 18 та йирик банк ихтиёрида жами 127,3 миллиард доллар шундай «ортиқча» капитал мавжуд. Уларнинг аксарияти мамлакат федерал захира тизими томонидан ўтказиладиган синовлардан муваффақиятли ўтиш учун зарур минимумдан сезиларли даражада ортиқ суммаларни сақламоқда.

Экспертларга кўра, АҚШ банк соҳасини иқтисодий инқироздан ҳимоялаш учун мўлжалланган захира фондлари капитали яқин орада камайиши мумкин. Президент Дональд Трамп соҳа устидан назоратни юмшатиш, банкларга тўпланган воситаларнинг бир қисмини дивидендлар тўлаш ҳамда акцияларни қайта сотиб олишга йўналтиришларига рухсат бериш ниятида эканлигини билдирган.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.