Яман ҳукумати АҚШга ушбу араб мамлакати ҳудудида Америка махсус топшириқли бўлинмалари жангчилари иштирокида террорчилик гуруҳларига қарши кураш бўйича қуруқликдаги махфий махсус операцияларни ўтказишни тақиқлади, деб ёзади «ТАСС».
The New York Times газетаси маълумотларига кўра, АҚШ махсус топшириқли бўлинмаларининг «Араб ярим оролидаги Ал-Қоида» террорчилик гуруҳи штаб-квартирасига уюштирган сўнгги рейди фуқаро шахслар ҳалок бўлишига олиб келгач, Яман ҳукумати амалдаги рухсатномани қайтариб олган.
Нашр таъкидлашича, тақиқ ҳақида на Пентагон ва на Яман томони расман эълон қилган. Газетанинг Америка ҳарбий тузилмаларидаги манбаларига кўра, Яман ҳукумати қарори АҚШ ушбу араб мамлакатида террорчиларга авиазарбалар беришда қўллайдиган учувчисиз учар қурилмалар иштирокидаги операцияларга дахлдор эмас.
АҚШ ҳарбий-денгиз кучлари махсус топшириқли бўлинмаларининг юқорида тилга олинган рейди Яманда 29 январь куни амалга оширилган эди. Уни ўтказиш чоғида бир нафар америкалик ҳарбий хизматчи, шунингдек, маҳаллий аҳоли вакиллари ҳалок бўлган эди. Террорчилар томонида эса 14 киши йўқ қилинган эди.
Изоҳ (0)