Ўзбекистонда болалар ва ёшлар спортини, жумладан, спортнинг қишки турларини ривожлантириш мақсадида Тошкент шаҳрининг Афросиёб ва Бешёғоч кўчалари кесишувидаги тўққиз гектар ҳудудда кўп тармоқли «Ҳумо» муз саройи қурилиши бошланди. Бу ҳақда Ўзбекистон Миллий олимпия қўмитаси матбуот хизмати маълум қилмоқда.
12 минг кишилик трибунага эга кўп функсионал сарой ҳудудида муз аренаси, машғулотлар ўтказиладиган майдон, ўқув-кўнгилочар болалар хиёбони, оилавий кўнгилочар марказлар, амфитеатр, фавворали хушманзара боғлар, ресторан ва рекрацион зоналар, боғ ва сайилгоҳ, замонавий паркинг ва бошқа кўплаб иншоотлар жойлашади.
Уларда жисмоний имконияти чекланган кишилар учун ҳам барча шароитлар яратилади.
Мажмуада ўлчамлари 60х30 метр бўлган иккита - асосий ва машқ муз ареналари режалаштирилган бўлиб, бино умумий майдони 74 минг квадрат метрни ташкил қилади, бино тўрт қаватдан иборат бўлиб, баландлиги 36 метрни ташкил этади.
Муз саройи 12,5 минг ўтириш жойларига эга бўлиб, концерт зали сифатида ўн минг, спорт мусобақалар ўтказиш зали сифатида эса 14 минг томошабинга мўлжалланган. Асосий бинода 300 ўринлик машқ аренаси ҳам лойиҳалаштирилган.
Мажмуа ҳудудида шунингдек, спорт музейи, болалар учун ёпиқ ўйингоҳ, тренажёр заллари, фитнес маркази, замонавий типдаги умумовқатланиш шаҳобчалари, спорт анжомлар дўкони ва бошқа хизмат кўрсатиш объектлари жойлаштирилади.
Велосипедлар ва роликларда учиш учун алоҳида йўлакчалар қурилиши режалаштирилган. Бундан ташқари бино ёнида 2000 та автомобиль учун мўлжалланган тўрт қаватдан иборат автотураргоҳ қурилиш ишлари режалаштирилган.
Аренада хоккей матчлари, шорт-трек, фигурали учиш, кёрлинг бўйича мусобақалар билан бир қаторда баскетбол, волейбол, гандбол, футзал, бокс, таэквондо ва бошқа спорт турлари бўйича беллашувлар ўтказиш имконияти бор.
Объект 2018 йилнинг 31 декабрь кунига қадар ишга туширилиши мўлжалланган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)