Дональд Трамп маъмурияти Марказий разведка бошқармаси (МРБ)нинг «махфий қамоқхоналари» — террорчиликда гумон қилинган шахсларни сақлаш ва қийноққа тутиш учун АҚШдан ташқарида ташкил этилган объектлар дастурини қайта ишга тушириш фикридан қайтди. Бу ҳақда Meduza хабар бермоқда.
The New York Times’нинг маълум қилишича, қамоқхоналарни қайта очиш ҳақидаги фармон қораламаси матбуотга чиқиб кетганидан сўнг, Республикачилар ва Демократлар партиялари Конгрессда мазкур режага норозилик билдирган.
2 февраль куни Миллий хавфсизлик масалалари бўйича кенгаш аъзоларига ҳужжатнинг янги қораламаси кўрсатилган ва унда «махфий қамоқхоналар» ҳақидаги қайдлар йўқ эди.
«Янги қораламада Барак Обама ёпишга уринган Гуантанамодаги қамоқхоналардан фойдаланишни кенгайтириш зарурати ҳақида яна бонг урилган», — деб ёзади The New York Times.
АҚШ «махфий қамоқхоналар» дастуридан 2000 йилларда фойдаланган. Дастурнинг мавжудлигини 2005 йили президент кичик Жорж Буш расман тан олган. Маълумотларга кўра, Польша, Литва, Руминия, Афғонистон ва бошқа мамлакатларнинг ҳудудларида жойлашган бу қамоқхоналарда гумонланувчилар қийноқларга тутилган.
Дональд Трамп террорчиликда гумон қилинаётганларга нисбатан қийноқларни қўллаш мумкинлиги, чунки «бу услуб иш бериши»ни бир неча бор таъкидлаган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)