«Ratel.kz» нашрида чоп этилган «Қирқилган ленталар иқтисодиёти» мақоласида Досим Сатпаев Қозоғистон «нефть нинаси»дан тушишга улгурмасдан учинчи модернизацияга киришаётгани ҳақида ёзди. Бу ҳақда «Telegraf.uz» хабар берди.
Мақолада Қозоғистон президенти халққа мурожаатида мамлакатни дунёнинг 30 та ривожланган давлатига яқинлаштирадиган учинчи модернизация ҳақида гапирди.
«Бу пайтда эса ушбу мамлакатларнинг кўпчилиги тўртинчи саноат инқилоби босқичига (Industry 4.0) кирмоқда, бунда ақл-идрок ҳар қандай хом ашёдан қимматроқ туради, сунъий интеллект эса саноат ишлаб чиқариши билан бирлашади.
Аммо Қозоғистон ҳукумати доимий равишда мамлакатнинг индустриал-инновацион тараққиёти ҳақида таъкидлаб келгани билан, Қозоғистон иқтисодиётининг рақобатбардошлиги ортмайди, чунки инсон ресурсларининг рақобатбардошлиги ошмайди», — дейилади мақолада.
Шунга қарамай, Жаҳон банки ҳисоб-китобларига кўра, 2017 йилда Қозоғистон иқтисодиёти Brent нефтининг йиллик ўртача нархи баррелига 50 доллар бўлиб турса, 1,9 фоизга ўсади, 2018 йилда эса 53,3 доллар ҳолатда 3,7 фоизга ўсади. Шунингдек, 2017 йилда нефть қазиб чиқариш ҳажми 84 миллион тоннагача ошиши эвазига Қозоғистон ялпи ички маҳсулотининг ўсиши 1,9 фоизгача тезлашиши мумкин.
Бироқ экспертлар фикрича, Қозоғистонда анчадан буён турғун «йўқотилган вақт» ҳиссиёти юзага келиб қолган.
Изоҳ (0)