ОАВ: Хитой полицияси Гонконгдаги меҳмонхонадан коррупцияда гумон қилинган миллиардерни ўғирлади

Хитой Халқ Республикаси раҳбари Си Цзиньпин оиласига алоқадорлиги билдирилаётган хитойлик миллиардер Сяо Цзяньхуа полиция томонидан Гонконгдаги меҳмонхонадан олиб кетилиб, Хитойга жўнатилди, деб хабар берди «Интерфакс». 

ОАВга кўра, ҳозирда Сяо Цзяньхуа қўлга олинган ва пора билан боғлиқ иш доирасида сўроқ қилинмоқда. Бизнесмен жойлашган хоналарда қаршилик аломатлари пайқалмади. Сяо аввалига компаниясининг ижтимоий тармоқлардаги саҳифаларида ўғирлаб кетилганини инкор этди, бироқ кейинчалик бу хабарлар ўчирилди. 

Бу ҳақда маълум қилган The Guardian нашри тадбиркорнинг ўғирлаб кетилиши ортида чиндан ҳам Хитой полицияси турган бўлса, бу Гонконг конституциясининг бузилиши эканлигини билдирди. 

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.