AFP (Agence France-Presse) француз ахборот агентлиги раҳбарияти Ғазода фаолият олиб бораётган мухбирларни эвакуация қилишга киришди. Бу ҳақда Anadolu хабар берди.
Эвакуация қилиш қарори Ғазода ўта кучли очарчилик ўлимга олиб келаётгани сабаб қабул қилинган.
“Журналистларнинг ҳаёти хавф остида. Шунинг учун биз Исроил расмийларидан мухбирларнинг оилалари билан бирга зудлик билан эвакуация қилинишига рухсат сўраймиз. Ғазодаги даҳшатли вазиятдан чуқур хавотирдамиз. Ойлар давомида ходимларимизнинг яшаш шароитлари кескин ёмонлашганига гувоҳ бўлдик. Уларнинг намунали жасорати, касбий садоқати ва матонатига қарамай, ҳозирги аҳволга чидаб бўлмайди”, деган агентлик раҳбарияти.
2024 йилнинг январь—апрель ойларида 8 нафар AFP ходими ва уларнинг оилалари Ғазодан эвакуация қилинган эди. Агентлик ушбу муваффақиятни эслатиб ўтиб, яна бир бор ўз ходимлари учун худди шундай чоралар кўришини таъкидлаган.
“AFP 1944 йил август ойида ташкил этилганидан бери турли тўқнашувларда кўплаб журналистлар ҳалок бўлган. Улар жароҳатланиб, ҳатто маҳбус бўлганига ҳам гувоҳ бўлганмиз. Аммо ҳеч биримиз ходимлар очликдан ўлганини эслай олмаймиз”, дейилади агентликнинг Хъдаги постида.
Committee to Protect Journalists (Журналистларни ҳимоя қилиш қўмитаси) статистикасига кўра, Ғазода 2023 йил 7 октябрда бошланган уруш давомида 186 нафар журналист ва медиа ходими ҳалок бўлган. Улардан 176 таси фаластинлик ва 2 таси исроиллик эди. Бу 2025 йил 16 июнга қадар олинган маълумотлар бўлиб, қўмита ҳозирда яна 130 дан ортиқ ҳолатни текширишни давом эттирмоқда.
Изоҳ (0)