Ўзбекистон терма жамоаси ва Москванинг “ЦСКА” клуби ҳужумчиси Аббосбек Файзуллаев фаолиятини Туркия Суперлигасида давом эттиришга яқин турибди. Футболчи аллақачон Истанбулга учиб борган ва 23 июль, чоршанба куни “Башакшеҳир” клуби учун тиббий кўрикдан ўтиши кутилмоқда.
Championat нашри хабарига кўра, футболчи 7,5 миллион евро эвазига турк клубига ўтмоқда. Агар трансфер расман тасдиқланса, Файзуллаевнинг собиқ жамоаси — “Пахтакор” ҳам бу келишувдан фойда кўради. Чунки Тошкент клуби ва “ЦСКА” ўртасидаги шартномада кейинги трансфердан 10 фоизлик улуш белгиланганди. Бу дегани, “Пахтакор”га тахминан 750 минг евро тўланади.
Файзуллаев “Башакшеҳир”га ўца, ушбу клубдаги иккинчи ўзбекистонлик футболчига айланади. Истанбулликлар бунга қадар “Рома”дан Элдор Шомуродовни ҳам ижарага олган эди.
Маълумот учун, Аббосбек Файзуллаев 2023 йилдан бери “ЦСКА” шарафини ҳимоя қилиб келади. У ҳозирга қадар москваликлар таркибида 72 та баҳсда майдонга тушиб, 8 гол ва 22 ассист муаллифига айланган. У клуб билан Россия Кубоги ҳамда Суперкубогини қўлга киритди. Transfermarkt портали футболчининг қийматини 8 миллион еврога баҳоламоқда.
Изоҳ (0)