Фарғонада беморнинг соғлом оёғини кесиб ташлаб, унинг ўлимига сабабчи бўлган шифокор 4 йил озодликдан маҳрум қилинди. “Дарё” суд ҳужжати билан танишди.
Воқеа 2024 йилнинг ноябрида юз берган. Жиноят ишлари бўйича Қува туман судининг 2025 йил 6 майдаги ҳукмига кўра, шифокор А.М. Жиноят кодексининг 116-моддасининг 3-қисми (касб юзасидан ўз вазифаларини лозим даражада бажармаслик одам ўлимига сабаб бўлиши) билан айбдор деб топилган. У 3 йил Соғлиқни сақлаш вазирлиги тизимида раҳбарлик ва шифокорлик вазифасида ишлаш ҳуқуқидан маҳрум қилиниб, 4 йил озодликдан маҳрум қилиш жазоси тайинланган.
Шифокор апелляция шикояти бериб, ҳаракатларида жиноят таркиби йўқлиги, беморнинг ўлими унинг ҳаракатлари билан боғлиқ бўлмагани ҳақида важлар келтирган ҳамда суд ҳукмини бекор қилиб, оқлов ҳукми чиқаришни сўраган. Жабрланувчининг қонуний вакили эса шифокордан 28 млн 995 минг сўм моддий ва 350 млн сўм маънавий зарар ундиришни сўраган. 16 июлда апелляция инстанциясининг ажрими билан дастлабки суд ҳукми ўзгаришсиз, апелляция шикоятлари қаноатлантирилмасдан қолдирилган.
Воқеа тафсилоти
Судланган шифокор А.М. Республика ихтисослаштирилган эндокринология илмий-амалий тиббий маркази Фарғона филиалининг хирургия бўлими бошлиғи лавозимида ишлаган. У 2024 йил 9 сентябрдан 2024 йил 25 октябргача ўз ҳисобидан таътилда бўлган. Бу вақтда бўлим мудири вазифасини вақтинча бажариш Д.Р. зиммасига юклатилган.
Бемор аёл 18 октябрда фарзандлари томонидан олиб келинган. Унга “қандли диабет иккинчи тури оғир шакли, декомпенсация босқичи, DTS нейроишемик шакли, Вангер-4, чап оёқ болдир соҳасида ампутациядан кейинги ҳолат тизза бўғими майдаланиб синиши” ташхиси қўйилган.
А.М. шу куни бўлимнинг вақтинча мудирини гўёки тажрибасиз сифатида кўрсатган ҳолда беморни даволаш ҳамда жарроҳлик амалиёти ўтказиш ишларидан ўзбошимчалик билан четлатган. Сўнгра беморнинг ҳаёти ва соғлиғини хавф остига қўйиб, бирор-бир тиббий кўрсатма бўлмагани ҳолда унинг “чап оёқ сон соҳасини ампутация қилиш” режасини ишлаб чиққан. Бу режани тиббий ҳужжатлар тарихига бўлимнинг вақтинчалик мудири номидан расмийлаштирган.
Аммо 19 октябрда бўлиб ўтган жарроҳлик амалиёти пайтида беморнинг бирон-бир касаллик асорати бўлмаган ўнг оёғи сон соҳасидан кесиб ташланган. Шифокорлар кейинчалик аёлнинг чап сон соҳасини ҳам кўр-кўрона ампутация қилган. Жарроҳлик амалиёти А.М. ўзбошимчалик билан танланган тиббиёт ходимлари ва тиббий соҳада мутахассисликка эга бўлмаган талаба иштирокида ўтказилган.
Бемор аёл бир вақтнинг ўзида икки оғир турдаги жарроҳлик амалиётини кўтара олмасдан, олган тан жароҳатлари асоратлари оқибатида 2024 йил 7 ноябрда вафот этган.
Жиноят кодексига кўра, касб юзасидан ўз вазифаларини лозим даражада бажармаслик одам ўлимига олиб келган бўлса, айбдор шахс 2 йилдан 5 йилгача озодликни чеклаш ёки 5 йилгача озодликдан маҳрум қилиш билан жазоланади.
Изоҳ (0)