Сицилияда Оскар лақабли Бенгалия йўлбарси кўчма циркдан қочиб кетди ва ошхона буюмлари дўкони ёнига ётиб олиб, маҳаллий фуқароларни қаттиқ қўрқитиб юборди. Бу ҳақда The Daily Mail’га таяниб, «РИА Новости» хабар берди.
Йиртқич хўжайинлари қўлидан эрта тонгда қочиб кетди ва бир неча соат давомида Палермо шаҳри кўчалари бўйлаб сайр қилди. Йўлдан ўтиб кетаётган автомобиллар ҳайдовчилари уни кўриб қолгач, полицияни чақирди.
Видеоёзувда йиртқич ҳайвон автомобиллар тураргоҳида девордан ичкарига мўралаб турган одамларга кўз қирини ташлаган ҳолда бемалол юриб кетаётганини кўриш мумкин. Ҳайвонни тутиш учун маҳаллий шосседаги транспорт ҳаракати тўхтатиб қўйилди. Полиция жониворга озор бермаслик учун унга транквилизатор отиш ўрнига, уни қафасга алдаб киритишга қарор қилди. Натижада йиртқични тутиб, циркка қайтариб олиб боришди.
Айни пайтда йўлбарс қай тариқа қочиб кета олгани номаълум.
Изоҳ (0)