Марказий банк корпоратив пластик карталардан фойдаланиш бўйича чекловларни олиб ташлаш учун чоралар кўрмоқда

Тадбиркорлик ҳамжамияти истакларидан келиб чиқиб, Ўзбекистон Марказий банки Корпоратив карталар тўғрисидаги янги Низомни қабул қилди ва уни Адлия вазирлигига рўйхатдан ўтказиш учун юборди, деб ёзади «Nuz.uz» Марказий банк пул муомаласи департаменти ходими Фахриддин Бобоевга таяниб. Янги низом барча чекловларни бекор қилади.

Унинг сўзларига кўра, корпоратив карталар барча ташкилотлар ва муассасалар томонидан ҳеч қандай чекловларсиз қабул қилинадиган бўлади. Аммо фақат битта чеклов кучда қолади, яъни корпоратив картани банкоматларда нақдлаштириб олиш мумкин бўлмайди.

Янги Низом Адлия вазирлигида расман рўйхатдан ўтказилгач, қонуний кучга киради.

Нашр таъкидлашича, юридик шахсларга тегишли корпоратив пластик карталардан фойдаланиш борасида, амалдаги Низом бўйича баъзи чекловлар мавжуд, яъни якка тадбиркорлар корпоратив карталар орқали уй-жой ва коммунал хўжаликлар ва давлат муассасаларининг баъзиларига тўловларни амалга ошира олмайди.