Шу кунларда Ўзбекистоннинг барча ҳудудларида мамлакат Биринчи Президентининг таваллуд топган кун – 30 январь санасини нишонлашга тайёргарлик кўрилмоқда. Таълим муассасалари, ҳарбий қисмлар, меҳнат жамоалари ва маҳаллаларда ушбу сана муносабати билан турли маданий-маърифий тадбирлар, хотира кечалари ўтказилмоқда. Бу ҳақда ЎзА хабар берди.
Тошкентнинг Сергели туманидаги Ҳабибий номидаги маҳалла фуқаролар йиғини ва Сергели тиббиёт коллежида бўлиб ўтган тадбирларда Биринчи Президент Ислом Каримовнинг Ўзбекистон мустақиллиги, халқ озодлигини таъминлаш йўлидаги улкан хизматларини ёшлар онгу қалбига сингдириш тарбиявий аҳамиятга эга экани таъкидланди.
– Бугун ёшларимиз тинч ва осойишта осмон остида, ота-онаси бағрида эмин-эркин улғаймоқда. Улар истиқлолни кўз қорачиғидек асраб-авайлаш, унинг қадрига етиш зарурлигини, бу ёруғ ва саодатли кунларимиз, бахтиёр ҳаётимиз халқимизнинг фидойи инсонлари чеккан машаққатлар эвазига келганини билиши керак, – дейди Ҳабибий номидаги маҳалла фуқаролар йиғини раиси Ҳусниддин Бегматов. – Буюк Йўлбошчимиз таваллуди муносабати билан ўтказилаётган тадбирларда халқимизга, айниқса, ёшларга бу ҳақда атрофлича ҳикоя қилиб бермоқдамиз.
Самарқанд давлат университетида ўтказилган ана шундай тадбирда Ислом Каримов ҳаёти ва фаолияти, бой маънавий мероси ҳақида сўз юритилди.
– Мустақилликнинг дастлабки йилларида Ислом Каримов томонидан ишлаб чиқилган машҳур беш тамойил қисқа даврда ҳаётда ўзини оқлаб, дунё давлатлари, халқаро ташкилотлар томонидан тараққиётнинг «ўзбек модели» сифатида эътироф этилди, – дейди Тошкент давлат юридик университети доценти Эшмуҳаммад Қодиров. – Кўплаб давлатлар бу тамойиллардан намуна олишга, уни ўз сиёсатига тарғиб этишга интилди. Таълим тизимидаги ислоҳотлар, қишлоқ жойларда аҳоли турмуш фаровонлигини ошириш борасида амалга оширилган чора-тадбирлар, бозор иқтисодиётига ўтиш жараёнида кучли ижтимоий сиёсат олиб борилиши мамлакатимиз эришган муваффақиятларнинг муҳим омиллари ҳисобланади.
Шундай тадбирлар мамлакатнинг барча ҳудудларида давом этмоқда.
Изоҳ (0)