Хитой клублари учун навбатдаги буйруқ: футболга сарф этилаётган маблағнинг 15 фоизи академиялар ривожи учун бўлиши шарт

Мамлакат футболини тубдан ислоҳ қилиш ва ривожлантириш йўлида тиним билмаётган хитойликлар Супер лига клублари учун навбатдаги талабларни илгари сурди. Бу ҳақда «Sports.ru» сайти хабар берди.

Хитой футбол ассоциацияси чемпионат стартига бир ойдан сал кўпроқ вақт қолганида Супер лига клубларининг янги мавсум учун режалари билан ҳисоблашмай, легионер футболчилар сонига бўлган чеклов масаласини кучайтириб қўйганди. Энди эса ташкилот клублар учун қўшимча талаблар қўйди.

• Хитой компаниялари Европанинг 14 та клубини ўзи билан ҳисоблашишга мажбур этиб улгурди. Мақсад — юрт футболини кўтариш

Биринчи навбатда Хитой футбол клублари ўзига тегишли академиялар ривожига эътибор қаратиши керак. Бунда бир йил давомида ишлатилган пулнинг 15 фоизи миқдорида футбол мактаблари учун ҳам сарф этиш талаб қилинган.

Агар клуб 100 миллион долларни катта футбол учун сарф қилса, академия учун 15 миллионнинг баҳридан кечиши керак. Чиқим қайсидир клубда 1 миллиард бўлса, академия учун 150 миллион топиш керак бўлади. Яъни, қиммат футболчиларни ўйнатиб, уларга отнинг калласидек пул тўлаётган жамоалар, хитойлик ёш футболчиларни рағбатлантириш борасида ҳам хотамтойроқ бўлиши керак. Бу ўз навбатида пулни орқа-олдига қарамай сарф этаётган клублар ҳовурини бир оз бўлса-да тушириш учун хизмат қилади.

• Расман: Хитой легионерлар сонига чекловни оширди. Ўзбекистон миллий термаси футболчилари захирада қолиши мумкин

Ҳар бир клуб ўзининг U15, U17, U19 жамоаларига эга бўлиши шарт. Бу Хитой ўсмирлар ва ёшлар терма жамоаларини ривожлантириш йўлида муҳим қадам бўлади. Шунингдек, ҳар бир клуб ўзининг замонавий спорт базасига эга бўлиб олиши керак. Унда камида 4 та стадион мавжуд бўлиши белгилаб қўйилди, шунинг ҳеч бўлмаганда 1 донаси сунъий қопламали бўлиши лозим.

Ассоциация клублар кирим ва чиқимини назорат қилиб боради. Бунда ташкилот мустақил аудиторлар ёллаб, клубларнинг пул айланмасини текшириб туради. Sina ахборот агентлигининг қайд этишича, трансфер ойнасида сарф этилаётган пуллар учун жавобгарлик ҳар бир клубда бўлади. Бунда футболчи учун сарф этиш мумкин бўлган максимал сумма кўрсатиб ўтилмаган. Бироқ унинг тахминан 30 миллион евродан ошмаслиги айтилган.

• Дунёдаги энг катта — Evergrande International Football School футбол академияси қандай вужудга келди?

Энг асосийси, барча клуб менежерлари пул ювиш масаласида огоҳлантирилган. Ҳомийлик ташкилотлари орқали келиб тушаётган маблағларни ўзлаштириш ҳукумат томонидан жиддий чоралар кўрилишига олиб келиши мумкин. Ташкилот эса бундай шахсларни футболдан бир умрга четлаштиришини айтган.