Туркиянинг Boeing 747 самолёти Бишкекнинг Манас аэропортига яқинига қулаган жойда 700 га яқин киши қидирув-қутқарув ишларига жалб этилган, деб ёзади «ТАСС» Қирғизистон фавқулодда вазиятлар вазирлигига таяниб.
«Айни пайтда ҳалокатга учраган самолётнинг иккинчи қора қутиси қидирилмоқда, бизнинг ходимларимиз ИИВ, шунингдек, бошқа хизматлар вакиллари билан ҳамкорликда ҳодиса жойида вайроналар уюмларини текширишда давом этмоқда», — дея аниқлик киритишди вазирликда. Тозалаш ишларига оғир махсус техника жалб қилинган. 17 январь, сешанба куни эрталаб қутқарувчилар ҳалокатга учраган ҳаво кемаси экипажининг тўртинчи аъзоси жасадини топишга муваффақ бўлган.
ФВВ маълумотларига кўра, айни пайтда қурбонларнинг оилаларига 31 та жасад топширилган. «Моргда фуқароларимиздан уч кишининг, экипаж аъзоларидан тўрт кишининг шахси аниқланмаган жасадлари қолди», — дейилади ФВВ хабарида.
Маълумот учун, 16 январь, душанба куни тонгда Бишкекнинг «Манас» аэропортидан бир неча километр масофада жойлашган «Дача» қўрғонига Туркиянинг MyCargo Airlines авиакомпаниясига тегишли «Боинг 747» юк самолёти қулаган эди.
Ҳодиса оқибатида қўрғондаги 32 та уй вайрон бўлган, расмий маълумотларга кўра, камида 31 киши ҳалок бўлган. 17 январь Қирғизистонда мотам куни деб эълон қилинган.
Изоҳ (0)