Дамашқ ташқарисидаги Вади-Барада водийсида Сурия ҳукумати ва мухолифатчи гуруҳлар ўртасида тузилиб, Сурия пойтахтини сув билан таъминлашни қайта тиклаш имконини берувчи ўт очишни тўхтатиш ҳақидаги битимни БМТ маъқуллайди. Бу ҳақда жаҳон ташкилоти матбуот хизмати вакили Эри Канеко маълум қилди, деб ёзади «ТАСС».
«Биз Вади-Барадага тегишли битим ҳақидаги хабарни маъқуллаймиз. Сўнгги маълумотларга кўра, ҳукумат ва Суриянинг Қизил Яримой ҳамжамияти муҳандислари ушбу туманга булоқларга ва инфратузилмага етказилган зарарни баҳолаш ва у ерда тезроқ таъмирлаш ишларини ўтказиш учун етиб келди», — деди у.
Айни пайтда шаҳарда аҳоли эҳтиёжининг бор-йўғи 30 фоизини қондириш учун етарли бўлган сув захиралари мавжуд.
«Жибҳат ан-Нусра» террорчилари томонидан ўтган йил декабрида амалга оширилган қўпорувчилик ҳаракатлари натижасида Сурия пойтахти ичимлик суви манбаларининг 80 фоизидан ажралиб қолди. Жангарилар бош водопроводни портлатиш билан бирга, уни дизель ёқилғиси билан ифлослантирди.
Изоҳ (0)