Олимлар тахминларига кўра, бир неча ҳафта ёки ойлар ичида Антарктидадаги Ларсен музлигидан майдони қарийб 5 минг квадрат километрга тенг айсберг синиб тушади, деб ёзади «Корреспондент.net».
Ўтган йилнинг декабрида Американинг NASA космик агентлиги Ларсен музлигида ҳосил бўлган, кенглиги 100 метр, чуқурлиги 500 метрга тенг ёриқ суратини намойиш этган эди.
Ушбу ёриқ океанга етганида, музликдан майдони 5 минг квадрат километрга тенг муз парчаси синиб тушади.
Бу бир ой ичида содир бўлиши мумкин. Айни пайтда синиқ океанга етишига 20 км қолган. Ўтган йилнинг декабрида ёриқ бир неча ҳафта ичида 18 км масофадан ўтган эди.
Антарктидадан синиб тушадиган муз бўлаги тарихдаги энг йирик айсберглар ўнлигига киради, аммо унинг денгизга чўкиши дунё океанлари сатҳига кўп ҳам таъсир қилмайди. Баъзи ҳисоб-китобларга кўра, агар муз бутун ҳолича сувга чўкса, денгиз сатҳи 10 сантиметрга кўтарилиши мумкин.
Изоҳ (0)