Қозоғистоннинг Беларусдаги элчихонаси бухгалтери салкам 700 минг долларни ўмаришда гумон қилиниб, қўлга олинди

Қозоғистоннинг Беларусдаги элчихонаси катта бухгалтери 680 минг доллардан ортиқ маблағни талон-тарож этишда гумон қилиниб, қўлга олинди. Бу ҳақда Қозоғистон коррупцияга қарши кураш миллий бюроси хабар бермоқда. 

Бюрога кўра, 2012—2015 йилларда А.Сейдуалиев элчихона биноси қурилиши бош пудратчиси «Активбизнесплюс» компаниясига гўё тўлов қилингани ҳақида сохта харажат касса ордерларини тузиб, 207 минг долларни ўмарган.

Шунингдек, у элчихонага Беларусь солиқ идораларидан қўшимча қиймат солиғидан қайтарма тарзида келиб тушган 474 минг доллардан ошиқ маблағни ҳам ўғирлаган.

Ҳозирда гумонланувчи Остона ички ишлар департаменти вақтинчалик сақлаш изоляторида эканлиги билдирилмоқда.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.