Навоийда 25 декабрь, якшанба куни халқ депутатлари вилоят кенгашининг навбатдан ташқари сессияси бўлиб ўтди. Сессия ишида Ўзбекистон Президенти Шавкат Мирзиёев қатнашди ва сўзга чиқди. Бу ҳақда давлат раҳбари матбуот хизмати хабар бермоқда.
Маърузада мустақиллик йилларида Навоий вилоятида барча соҳаларда ислоҳотлар амалга оширилгани, янги бино ва иншоотлар, ижтимоий объектлар, уй-жойлар барпо этилгани таъкидланди.
Кейинги беш йилда вилоят ялпи ҳудудий маҳсулоти 130,3 фоизга ошди. Саноат корхоналари сони 1049 тадан 1475 тага етди. Илгари вилоятдаги саноат корхоналари томонидан 122 турдаги саноат маҳсулотлари ишлаб чиқарилган бўлса, бугунги кунга келиб уларнинг тури 300 дан ошди.
Айни пайтда вилоятда жиддий эътибор қаратиш лозим бўлган бир қатор долзарб масалалар мавжуд эканлиги ҳам қайд этилди. Хусусан, қишлоқ хўжалиги маҳсулотларини қайта ишлаш саноатини ривожлантириш учун мавжуд бўлган жуда катта имкониятлар ишга солинмаяпти.
Сессияда ташкилий масала кўрилди. Ўзбекистон Республикаси Президенти Шавкат Мирзиёев тақдимига биноан Олий Мажлис Сенати бюджет ва иқтисодий ислоҳотлар масалалари қўмитаси раиси лавозимида ишлаб келаётган Қобул Турсунов Навоий вилояти ҳокими этиб сайланди.
Эслатиб ўтамиз, олдинроқ Навоий вилоятининг собиқ ҳокими Эркин Турдимов Сурхондарё вилояти ҳокими этиб тасдиқлангани хабар қилинганди.
Изоҳ (0)