Чегара билмаётган Хитой футбол клублари деярли ҳар куни 1 та шов-шувли трансферга қўл урмоқда. Лионель Месси учун йилига солиқлардан ташқари соф 100 миллион евро таклиф қилаётган ҳам, Златан Ибраҳимовичга эса ҳар йили 120 миллион санаб бермоқчи бўлган ҳам, «Ювентус» таркибига сиғмай қолган Карлос Тевесни жаҳонда энг катта маош оладиган футболчига айлантирган ҳам айнан Хитой клублари ҳисобланади.
Бироқ мана-ман деган Хитой жамоалари кучли дарвозабонларни мамлакатга олиб келолмайди. Жанлуиджи Буффон, Икер Касильяс ёки Давид Де Хеа Хитойга кўчиб ўтиш орзуси билан яшайди.
Бу тақиқланганми?
Ҳа, Хитойда хорижий дарвозабонлар билан шартнома тузиш 2001 йилдаёқ расман тақиқлаб қўйилган. Бу ҳақда «Championat.asia» Squawka нашрига асосланиб маълумот берди. Бунга сабаб сифатида чет эллик посбоннинг маҳаллий дарвозабонларнинг ўсишига ҳалал бериши мумкинлиги кўрсатилган. Оқибатда бу Хитой терма жамоасига қимматга тушиши мумкин экани айтилган.1994—2000 йиллар оралиғида Хитой клублари бор-йўғи 3 нафар легионер билан шартнома тузиши мумкин эди. 2001 йилга келиб 4 нафар хорижий футболчига рухсат этилди. Бироқ майдонда уларнинг 3 нафари ҳаракат қилишга ҳақли.
Бу иш беряптими?
Хитойлик посбонлар бу қарорлардан кейин ўсишга эришган деб маълумот берилмоқда. Масалан, «Гуанжоу Эвергранд» клуби посбони Жен Чен Хитой термаси дарвозасини ишончли қўриқлайди. Унинг меҳнатлари «Гуанжоу Эвергранд»нинг Осиё Чемпионлар Лигасида ғолиб чиқишига олиб келди.
Ўзбекистонда қандай?
Ўзбекистон ҳам Хитойнинг изидан бормоқда. 2016 йилги мавсум мамлакат Олий Лигасида бирорта ҳам хорижлик посбон кўриниш бермади. Аввалги мавсумларда «Нефтчи» ва «Навбаҳор» клублари легионер дарвозабонлар хизматидан фойдаланаётганди.Ўзбекистонда 3 нафар хорижий ва 1 нафар осиёлик футболчи ҳаракат қилиши мумкин. Худди Осиё Чемпионлар Лигасида бўлгани каби. Бироқ дарвозабоннинг хориждан бўлишига чеклов бор.
Изоҳ (0)