Трамп Клинтоннинг сайловлардаги мағлубиятини қайси штатларга эътибор қаратишни билмагани билан изоҳлади

АҚШнинг сайланган президенти Дональд Трамп Демократлар партиясидан собиқ номзод Ҳиллари Клинтон қайси штатларга таянишни билмагани учун сайловда ютқазганини маълум қилди. У сайлашга вакил қилинганлар овози учун курашиш сайловчилар овозини олишга қараганда қийинроқ эканини таъкидлади, дея хабар беради «Корреспондент.net».

«Сайлашга вакил қилинганлар коллегияси овозларини олиш кампаниясини юритиш халқ овозини олишга нисбатан анча қийин ва мураккаб. Ҳиллари қайси штатларга кўпроқ эътибор қаратишни билмаган. Агар ғолиб халқ томонидан сайланганида, сайловларни бундан ҳам яхшироқ ўтказган, бироқ кампанияни бошқача олиб борган бўлардим», — дея ёзди Трамп Twitter’даги саҳифасида.

Эслатиб ўтамиз, олдинроқ сайлашга вакил қилинганлар Трампни АҚШ президенти лавозимига сайлагани ҳақида хабар берилганди.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.