19 декабрь куни бўлиб ўтган Россия — НАТО кенгаши доирасидаги мулоқот ҳалол ва муфассал бўлди. Бу ҳақда НАТО бош котиби Йенс Столтенберг маълум қилди, деб ёзади «РБК».
Унинг сўзларига кўра, «кескин вазиятлар чоғида мулоқот энг муҳим нарса». У Россия ва НАТО мулоқот тарафдори эканлигини ва алоқа учун каналларни очиқ тутишини таъкидлади. Столтенберг муҳокама учун биринчи мавзу Украина «ичи ва ташидаги» инқироз бўлганини айтди. Унинг қайд этишича, альянс ва Россияда ушбу масала бўйича чуқур зиддият бор.
Столтенберг альянс Қримнинг Россияга қўшилишини «ноқонуний» деб тан олмаганини ва бундай қилмаслигини таъкидлади. У альянс Украина суверенитети ва ҳудудий дахлсизлигига катта кўмак бераётганини қайд этди.
НАТО бош котиби Минск келишувларини бажаришнинг муҳимлиги ва зарурлигини айтди. Унинг сўзларига кўра, альянс Россияни Украина жануби-шарқидаги қуролли гуруҳларга таъсиридан фойдаланиб, келишув шартларини бажаришга чақиришини сўраган. Бундан ташқари, Россия — НАТО кенгашида Афғонистондаги хавфсизлик билан боғлиқ вазият муҳокама қилинган.
Столтенберг мулоқотсиз альянс ва Россия ўз ихтилофларини бартараф қилиб, ҳамжиҳатликни яхшилай олмаслигини таъкидлади.
Изоҳ (0)