Давлат маблағини ўмариш ва пора беришга уринишда айбланган қозоғистонлик ҳокимлар гаров эвазига қўйиб юборилди

Жанубий Қозоғистондаги қишлоқларнинг 7 нафар ҳокими гаров пули эвазига ҳибсдан озод этилди. Бу ҳақда Kazakhstan Today хабар бермоқда. 

«Дастлаб етти нафар мансабдорга нисбатан ҳибсга олиш чораси қўлланганди. Кейинчалик уларнинг шикояти туфайли вилоят суди апелляция коллегияси мазкур чорани кўриб чиқди ва гаровга алмаштирди», — дея маълум қилди вилоят прокуратураси бошқарма бошлиғи Бауиржан Бердибеков.

Қозоғистон Аксилкоррупциявий хизмати томонидан Жанубий Қозоғистон вилоятининг Махтаорол туманидаги қишлоқ округлари ҳокимлари хусусий боғчалар раҳбарлари билан тил бириктириб, 100 миллион тенгедан кўпроқ бюджет маблағини талон-тарож этгани аниқланганди. Мансабдорлар бир болани бир неча боғчага жойлаштириб, тарбияланувчиларнинг сохта рўйхатларини тузган. Шу тариқа болалар сони ва уларга сарфланадиган харажатлар суммаси ҳам сунъий равишда оширилган.

Шунингдек, ҳокимлар Аксилкоррупциявий хизмат мансабдор шахсларига пора бериш орқали жиноий жавобгарликдан қутулиб қолишга ҳаракат қилган.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.