Буюк британиялик эркак кетма-кет етти йилдан буён ишдаги ҳамкасбларига Янги йил совғаларини сотиб олади, ҳар йили совғаларга ўртача 200—300 фунтдан сарфлайди, деб ёзади TJournal. Бу йил эса у минг киши учун ҳадялар тайёрламоқда.
57 ёшли Стивен Ньюман Мерсисайд графлигида яшайди. У Ядро саноатини тартибга солиш бошқармасида катта лавозимда ишлайди. Ҳамкасбларига ҳар йили совғалар бериш ғояси Ньюманда етти йил олдин пайдо бўлди, ўшанда у ўзи ишлайдиган бўлимдаги 12 кишига онлайн дўкондан чегирма билан харид қилинган бош кийимларни ҳадя қилган эди. Ходимларнинг қувончини кўриб, Ньюман буни анъанага айлантиришга қарор қилди.
Лавозими ошиб боргани сари, 2011 йилга келиб, Ньюман 50 нафар, 2015 йилга келиб эса, 500 нафар ҳамкасбига сюрприз тайёрлади. У ўз ҳамкасблари юзида табассумни кўриб, севинишини айтади.
Ньюман совғаларни бутун йил бўйи сотиб олади, у доим манфаатли таклифларни қидиради ва якунда барчасига кўпи билан 300 фунт сарфлайди.
Ньюманнинг қўшнилари, дўстлари кўпинча ундан нима учун бундай хайрия билан шуғулланиши ҳақида сўрайди. Аммо, Ньюманнинг ўз сўзларига кўра, бу унга шунчаки завқ бағишлайди.
Изоҳ (0)