Бугун — 15 декабрь куни футбол бўйича клублар ўртасидаги Жаҳон Чемпионатида ярим финалнинг иккинчи ўйини ўтказилиб, «Реал Мадрид» Мексиканинг «Америка» жамоасига қарши ўйинда майдонга тушади. Ярим финалнинг биринчисида зафар қучган Япониянинг «Кашима Антлерс» клуби Осиё клублари орасида биринчи бор финалда ўйнаш ҳуқуқини қўлга киритган.
Клублар ўртасидаги Жаҳон Чемпионати финалида энг кўп бор «Барселона» кўриниш берган. Каталония клуби ўз тарихида 4 бор ҳал қилувчи ўйинда иштирок этган бўлиб, шуларнинг 3 тасида бош совринга эга чиққан.
«Барселона» 2006 йилги мавсум финалда Бразилиянинг «Интернасионал» клубидан 0:1 ҳисобида енгилган бўлса, 2009 йил Аргентинанинг «Эстудиантес» жамоасини 2:1, 2011 йил Бразилиянинг «Сантос» клубини 4:0 ва 2015 йил Аргентинанинг «Ривер Плейт» клубини 3:0 ҳисобида таслим қилган.
Жаҳон Чемпионатида «Барселона»дан кейинги натижа Бразилиянинг «Коринтианс» клубига тегишли. 2000 йил жамоа финалда «Васко де Гама»ни таслим қилган бўлса, 2012 йил Лондоннинг «Челси» клубини 1:0 ҳисобида мағлуб этган.
Мадриднинг «Реал» клуби эса Жаҳон Чемпионати финалида ҳозирга қадар 1 марта тўп сурган. 2014 йилги мавсум «қироллик клуби» Аргентина етакчиси «Сан Лоренцо»ни 2:0 ҳисобида мағлуб этган.
2016 йилги мавсум чемпионлигини қўлга киритиши учун Зинедин Зидан жамоаси «Америка» ҳамда «Кашима Антлерс»ни мағлуб этиши шарт. Шунда у «Коринтианс»нинг натижасини такрорлаб, «Барселона»га совринлар сони бўйича яқинлашиб олади.
«Реал»нинг «Америка»га қарши ўйини Тошкент вақти билан 15:30 да старт олади.
Маълумот учун, жамоалари финалда иштирок этиши борасида Бразилия пешқадам бўлиб, унинг 5 та клуби ЖЧ финалида тўп сурган: «Коринтианс», «Васко де Гама», «Сан Пауло», «Интернасионал», «Сантос». Аргентинанинг эса «Бока Хуниорс», «Эстудиантес», «Сан Лоренцо», «Ривер Плейт» клублари финалда ўйнаган ва барчаси мағлуб бўлган.
Англияда жамоалар сони 3 та: «Челси», «Юнайтед» ҳамда «Ливерпуль». Фақатгина «қизил иблислар»га бош соврин насиб қилган.
Изоҳ (0)