Сурия армияси халқ кўнгиллилари қўллаб-қувватлаши билан жангарилар назорати остида бўлган Алеппо шарқий қисмининг 60 фоизини озод қилди. Бу ҳақда «Интерфакс» хабар бермоқда.
«Ал-Масдар» нашрига кўра, шаҳарнинг шарқий қисмида жангарилар мудофаасини ёриб ўтгандан сўнг ҳукумат кучлари Алеппони озод қилиш операциясининг иккинчи қисмига ўтди. Армия бўлинмалари ҳужумни Алеппо халқаро аэропортидан ғарбда жойлашган университет шаҳарчасидан бошлади. Бир неча кун ичида 8 даҳа озод қилинди ва Шоир ҳамда Боб ал-Ҳадид туманларида жангарилар қуршовга олинди. Ҳарбийларнинг мақсади — Ал-Боб шоссеси ва аэропортни шаҳар марказидаги истеҳком билан боғловчи йўл оралиғидаги барча ҳудудни озод қилиш.
Жангарилар тўлиқ қамалда қолмаслик учун эски шаҳардаги марраларини тарк этиши кутилмоқда. Олдинроқ улар ҳукумат армияси вакиллари билан таслим бўлиш шартлари ҳақида махфий музокаралар олиб бораётгани ҳақида хабар берилганди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)