«Адолат» Социал-демократик партиясидан Ўзбекистон Президентлигига номзод бўлган Наримон Умаров партия Ўзбекистон халқининг танловини ҳурмат қилишини маълум қилди. Бу ҳақда «Дарё» мухбири Мадина Нурман хабар берди.
Сайловчиларнинг 3,46 фоиз овозини қўлга киритган Наримон Умаровнинг сайлов якунлари бўйича ўтказган брифингда таъкидлашича, «сайлов натижалари партия кутган даражада бўлмади, лекин бундан хафа эмасмиз».
«Кўппартиявийлик шароитида, очиқ-ошкора, халқаро андозалар ва демократик талабларга тўла мувофиқ тарзда бўлиб ўтган мазкур сайлов натижаларини тан олган ҳолда, унинг адолатли бўлганини эътироф этамиз ва халқимизнинг танловини ҳурмат қиламиз», — деди Наримон Умаров.
Наримон Умаров ўзи раҳбарлик қилаётган партия номидан Шавкат Мирзиёевни «халқ томонидан билдирилган юксак ишонч» билан табриклади.
«Ишонамизки, мамлакатимизнинг янги сайланган Президенти халқимиз фаровонлиги йўлида олдимизга қўйган дастурий мақсадларимизни амалга оширишда бизни ҳам қўллаб-қувватлайди», — деди Наримон Умаров.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)