Шанхай ҳамкорлик ташкилоти кузатувчилар миссияси Ўзбекистон Президенти сайлови очиқ, эркин ва демократик руҳда ўтганини эътироф этди. ШҲТ бош котиби Рашид Алимов 5 декабрь, душанба куни Тошкентда ташкиллаштирилган брифингда бу ҳақда маълум қилди, дея хабар беради «Газета.uz».
«Бизнинг миссия Ўзбекистон Республикаси Президенти сайлови миллий сайлов қонунчилиги талаблари ҳамда Ўзбекистон Республикаси томонидан қабул қилинган халқаро мажбуриятга мувофиқ келганини маълум қилади. Миллий қонунчилик меъёрларининг бузилиши, сайлов қонунийлигини шубҳа остида қолдирадиган ҳолатлар қайд этилмади. Миссия сайловнинг очиқ, эркин ва демократик руҳда ўтганини эътироф этади», — дея таъкидлади Рашид Алимов.
Миссия президентлик сайлови Ўзбекистонда демократик жараёнларнинг келгусида тараққий этиши учун муҳим қадам бўлганини билдирди.
Миссия раҳбари Ўзбекистон халқини бўлиб ўтган Президент сайлови билан қутлаб, сайловда ғолиб чиқувчи давлат раҳбарига мамлакат мустақиллиги ва суверенитетини мустаҳкамлаш, ижтимоий-иқтисодий ривожлантириш йўлида муваффақият, жамият ҳаётининг барча жабҳаларида зафарлар ёр бўлишини тилади.
Рашид Алимов Марказий сайлов комиссияси, ТИВ ҳамда Ўзбекистоннинг бошқа ташкилот ва муассасаларига ШҲТ миссиясининг эркин, очиқ фаолият олиб боришида яратиб берилган шароитлар учун чуқур миннатдорлик билдирди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)