Сайловчиларнинг 33 фоиздан ортиғи овоз берди: Ўзбекистон Президенти сайлови бўлиб ўтган деб ҳисобланади

Ўзбекистон Президенти сайловида соат 11:00 гача сайловчилар рўйхатига киритилган 20 миллион 428 минг 891 сайловчининг 33,73 фоиздан ортиғи овоз беришда иштирок этди. Бу ҳақда Сайловни ёритиш бўйича матбуот марказидан «Дарё» мухбири Мадина Нурман маълум қилди.

Шундай қилиб, «Ўзбекистон Республикаси Президенти сайлови тўғрисида»ги қонуннинг 35-моддасига кўра, Президент сайлови бўлиб ўтган, деб ҳисобланади. Унга кўра, «сайлов, агар унда сайловчилар рўйхатига киритилган сайловчиларнинг 33 фоизидан ками иштирок этган бўлса, ўтмаган деб топилади».

Аввалроқ, Тошкент вақти билан соат 8:00 ҳолатига кўра сайловчиларнинг 7,4 фоизи, 9:00 ҳолатига кўра 17,72 фоизи, 10:00 ҳолатига кўра 25,49 фоизи овоз бериб бўлгани ҳақида хабар берилган эди.

Маълумот учун, Ўзбекистон Президентлигига номзодларнинг бари сайловда овоз бериб бўлди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.