Saylovchilarning 33 foizdan ortig‘i ovoz berdi: O‘zbekiston Prezidenti saylovi bo‘lib o‘tgan deb hisoblanadi
O‘zbekiston Prezidenti saylovida soat 11:00 gacha saylovchilar ro‘yxatiga kiritilgan 20 million 428 ming 891 saylovchining 33,73 foizdan ortig‘i ovoz berishda ishtirok etdi. Bu haqda Saylovni yoritish bo‘yicha matbuot markazidan “Daryo” muxbiri Madina Nurman ma’lum qildi.
Shunday qilib, “O‘zbekiston Respublikasi Prezidenti saylovi to‘g‘risida”gi qonunning 35-moddasiga ko‘ra, Prezident saylovi bo‘lib o‘tgan, deb hisoblanadi. Unga ko‘ra, “saylov, agar unda saylovchilar ro‘yxatiga kiritilgan saylovchilarning 33 foizidan kami ishtirok etgan bo‘lsa, o‘tmagan deb topiladi”.
Avvalroq, Toshkent vaqti bilan soat 8:00 holatiga ko‘ra saylovchilarning 7,4 foizi, 9:00 holatiga ko‘ra 17,72 foizi, 10:00 holatiga ko‘ra 25,49 foizi ovoz berib bo‘lgani haqida xabar berilgan edi.
Ma’lumot uchun, O‘zbekiston Prezidentligiga nomzodlarning bari saylovda ovoz berib bo‘ldi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
