...Ўттиз тўрт ёшли кўҳликкина бу жувон бир қарашда дунёда ҳеч ташвиши йўқ инсонга ўхшайди: кўзлари кулиб туради, бироқ у тўққиз йилдан буён ўз организмида иммунитет танқислиги вируси билан курашмоқда. Бу ҳақда ЎзА ҳикоя қилмоқда.
Ўзининг айтишича, ҳамшира бўлиб ишлаб юрганида эҳтиётсизлик туфайли ишлатилган шприц нинасидан жароҳат олиб вирусни юқтириб олган. Эри бундан хабар топгач, қизи билан кўчага ҳайдаган. Даставвал аёл «шок»ка тушади, йўл тополмайди. Маълум вақт ўтгач, юрагида минг бир хавотир билан қизини ОИВ тестидан ўтказади. Қизалоқ қонида мазкур вирус йўқлиги аниқланганда аёл Республика ОИТСга қарши кураш марказида даволана бошлайди.
Ўзбекистонда ОИВ/ОИТСга чалиниш кўрсаткичи МДҲ давлатлари орасида анча паст. 2013 йил 23 сентябрда қабул қилинган «Одамнинг иммунитет танқислиги вируси келтириб чиқарадиган касаллик (ОИВ инфекцияси) тарқалишига қарши курашиш тўғрисида»ги қонунига мувофиқ ОИВ инфекциясини юқтирган шахсларнинг ижтимоий муҳофазаси мустаҳкамланди, уларга кўрсатилаётган тиббий хизмат сифати яхшиланди, эпидемияга қарши курашиш самарадорлиги ошди. ОИВ инфекциясига чалинган бемор болаларга ойлик нафақа белгиланди.
Ҳар йили мазкур хасталикни аниқлаш учун зарур лаборатория жиҳозлари, тест-системалар олиш учун давлат бюджетидан 5 миллиард сўмдан зиёд маблағ ажратилмоқда. ОИВни иммунофермент таҳлил усулида аниқлашда мамлакат тиббиётида кенг фойдаланиладиган замонавий 4-авлод тест тизимлари илгари хориждан келтирилган бўлса, бугун улар Ўзбекистон Фанлар академияси қошидаги «Радиопрепарат» давлат корхонасида ва академиянинг Ўсимлик моддалари кимёси институтида ишлаб чиқарилмоқда.
Мамлакатда ОИВ билан касалланиш кўрсаткичлари 2015 йилда 5,5 фоиз, 2016 йилнинг ўтган даврида 8 фоиз пасайишига эришилди. Республика ОИТСга қарши кураш маркази олимларининг «ОИВ инфекциясининг онадан болага юқиши хавфини баҳолайдиган мезонлар» тўғрисидаги ихтироси натижасида ҳомиладор аёлларни рўйхатга олингандан то бола 2 ёшга тўлгунича уларда юзага келиши мумкин бўлган хавфларни тиббиёт ходимлари олдиндан аниқлаб, ўз вақтида бартараф қилиб бориши йўлга қўйилди. Бунинг натижасида, бугун ОИВ инфекцияли онадан соғлом бола туғилиш кўрсаткичи Ўзбекистонда 99,3 фоизни ташкил этмоқда. Ваҳоланки, ривожланган Европа давлатларида бу кўрсаткич ўртача 98,5 фоизга тенг.
...Дарвоқе, хабар аввалида ҳикоя қилинган аёлнинг кейинги тақдири ўқувчиларни қизиқтираётган бўлса керак.
— Бу аёлнинг ҳаётга интилиши ҳаммамизга, аввало, ўзига ёрдам берди, — дейди Республика ОИТСга қарши кураш маркази психологи Азиза Аҳмедова. — Зарур дориларни вақтида олиб, психологик тренингларда фаол қатнашди. Уч йил аввал ўзи каби ОИТСга чалинган беморимиз билан турмуш қурди. Эр-хотин организмида вирус хуружи ўта паст вақтда табиий йўл билан соғлом фарзанд кўришди. Ҳозир иккинчи қизи икки ёшда. Ҳар томонлама соғлом. Аҳил-тотув ҳаёт кечиришмоқда. Аёл келгуси фаолиятини ўзи каби беморларга ёрдам беришга бағишлади.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)