Тошкентнинг Юнусобод-11 мавзесидаги кўп қаватли уйлар ва хусусий ҳовлилар оралиғидаги йўл Facebook’даги «Водители Ташкента» гуруҳида муҳокамаларга сабаб бўлди.
«Юнусобод-11 даги манзара. Бу йўл (таъмири) учун масъул кишилар ҳозир нима иш билан банд экан-а, қизиқ», — деб ёзган йўлдан олинган суратлари билан мавзуни очиб берган фойдаланувчи.
Суратларда кўрсатилган ҳудудда ҳозирда истиқомат қилаётган ва бир вақтлар яшаган фойдаланувчилар бу йўл қачондир таъмирланганини эслай олмаслигини ёзган.
«Мен шу ерда 32 йил яшаганман ва эсимни таниганимдан бери у ердаги йўл шу аҳволда бўлган. Отамнинг дўсти бу жойни ‘автомобилнинг юргизгичини текшириш йўли’ деб атарди», — дейди фойдаланувчилардан бири.
«Ҳали ҳам бўлса қор паст-баландликларни ёпиб турибди, одатий кунларда эса у ерда миналар портлатилган деб ўйлайсан киши», — деб ёзади яна бир фойдаланувчи.
«Кеча шу йўлга кирган ҳамма ҳайдовчилар амаллаб орқага қайтиб чиқаётган эди. Худди дарё тўлқинлари музлаб қолганга ўхшайди», — дейди фойдаланувчилардан бири. «Бугун адашиб кириб қолгандим шу йўлга, тавба қилиб юбордим кирганимга», — дейди бошқа фойдаланувчи.
«Даҳшатли йўл! Бунақанги об-ҳавода у ерда пиёда юриш ҳам хавфли. Бугун боғчадан қайтарканмиз, ўғлим икки марта сирпаниб кетиб, йиқилди. Келиб кўрсангиз, суратдагидан ҳам ёмонроқ жойлари бор бу йўлнинг», — деб ёзади бир она.
Фойдаланувчилардан бирининг ёзишича, икки йилча аввал шаҳар маъмурлари «Тошкент» телеканалидаги «Очиқ мулоқот» кўрсатувида чиқиш қилиб, бу йўлни 2015 йилда таъмирлашга ваъда берган.
«Водители Ташкента» гуруҳининг баъзи аъзолари эълон қилинган суратларга ҳазил муносабат ҳам билдирган. «Мен бўлса бу 3D-суратлар бўлса керак, деб ўйлабман», — деб ёзади фойдаланувчи. Бошқа бири эса йўлнинг аҳволини Ой ландшафтига қиёслаган.
Фойдаланувчилар мавзелар, маҳаллалар ичида бундай йўлларнинг бутун Юнусобод бўйлаб, Тошкентнинг бошқа туманларида ҳам кўплаб топиш мумкинлигини ёзган. Баъзилар бу масала юзасидан Ўзбекистон бош вазири виртуал қабулхонасига мурожаат қилишни тавсия этган.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)