Бразилия президенти Мишел Темер Колумбиядаги авиаҳалокатда қурбон бўлган бразилиялик футболчилар хотирасига мотам эълон қилди. Бу ҳақда, Globo телерадиокомпаниясига асосланиб, «Интерфакс» хабар бермоқда.
Мотам 29 ноябрдан бошланиб, уч кун давом этади.
Бундан ташқари, Темер ҳалок бўлганларнинг қариндошларига ёрдам кўрсатиш бўйича топшириқ берди.
Лайнер 29 ноябрга ўтар кечаси Ла-Уньон шаҳри яқинида ҳалокатга учради. Ҳаво кемаси бортида 72 йўловчи ҳамда 9 нафар экипаж аъзоси бўлган. Самолёт ичида футбол бўйича Бразилия А сериясида ҳаракат қилаётган «Шапекоэнсе» клубининг 27 футболчиси бўлгани ҳам хабар қилинганди.
«Шапекоэнсе» футболчилари 1 декабрь куни Копа Судамерикано – Жанубий Америка минтақаси клублари ўртасидаги Копа Либертадорес турниридан кейин нуфузи жиҳатдан иккинчи ўринда турадиган мусобақаси доирасида «Атлетико Насьональ» клубига қарши майдонга тушиши керак бўлган.
Сўнгги маълумотларга кўра, Колумбиядаги авиаҳалокат оқибатида қурбон бўлганлар сони 75 кишига етди.
Изоҳ (0)