Англия футбол ассоциацияси (FA) мамлакат терма жамоаси сардори, «Манчестер Юнайтед» клуби ҳужумчиси Уэйн Рунини Испания терма жамоаси билан ўртоқлик ўйини арафасида ичкиликбозлик кечасида иштирок этгани учун жазоламасликка қарор қилди. Бу ҳақда «ТАСС» хабар бермоқда.
Руни Англия термасининг Испанияга қарши 2:2 ҳисобида якунланган ўртоқлик ўйинида майдонга тушмади. «Уч шерлар» бош мураббийи вазифасини бажарувчи Гарет Саутгейт ҳужумчи тизза жароҳати туфайли майдонга туша олмаганини таъкидлаганди. Бироқ Буюк Британия матбуоти Уэйн Руни ичкиликбозликка берилгани учун терма жамоа таркибидан жой олмагани ҳақида хабар берган.
Таъкидланишича, англиялик футболчи терма жамоа жойлашган меҳмонхонанинг барида бўлиб ўтган кечада иштирок этган. Унинг суратлари ижтимоий тармоқларда тарқалиб кетгач, 16 ноябрь куни 31 ёшли футболчи расман узр сўраган.
FA ҳодиса юзасидан текширув ўтказилиши маълум қилинган баёнот тарқатганди. Шунингдек, ассоциация терма жамоада ўйинчиларнинг кечки пайт меҳмонхонадан чиқишига тақиқ жорий этади.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)