Индонезия полицияси 4 ноябрда бўлиб ўтган оммавий аксилҳукумат намойиши чоғида қўлга олинганлар орасида камида тўққиз киши ИШИДга алоқадор эканлигини маълум қилди. Бу ҳақда «ТАСС» хабар бермоқда.
Мамлакат ҳуқуқ-тартибот идоралари расмий вакили Бой Рафли Амарга кўра, ҳибсга олинганларнинг шахси аниқланган. Улар орасида, жумладан, индонезияликларни Сурияда террорчилар тарафида жанг қилиш учун фаол ёллаган Саулихун, шунингдек, Яқин Шарқ давлатларидан қайтган маҳаллий фуқароларни жойлаштириш учун жавоб берган Рено Сухарсоно бўлган. Қолганлар эса террорчиларга қўшилишни мўлжаллаган янги кўнгиллиларни шуғуллантириш билан машғул бўлган.
Жакарта губернатори Басука Чахай Пурнамага қарши оммавий норозилик намойиши камида 100 минг кишини тўплади. Аввалига тинч кўринишда бўлган намойиш кейинчалик полиция билан тўқнашувга айланиб кетди. Расмий манбаларга кўра, 350 киши жароҳат олди.
Мазкур митинг арафасида полиция раҳбари Тито Карнавиан акцияда ИШИД тарафдорлари иштирок этиши мумкинлиги ҳақида огоҳлантирганди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)