«Спорт» телеканали қорда ўтадиган Ўзбекистон Кубоги ярим финали ва БААда ўтадиган ОЧЛ финалини трансляция қилади

ЎзМТРКнинг «Спорт» телеканали бугун — 26 ноябрь куни бўлиб ўтадиган футбол бўйича Ўзбекистон Кубогининг ярим финал учрашувини жонли кўрсатади. Бу ҳақда «Championat.asia» нашри маълумот берди.

«Локомотив» ва «Бунёдкор» клублари ўртасидаги ярим финалнинг биринчи ўйинида «темирйўлчилар» 1:0 ҳисобида зафар қучганди. «Бунёдкор» стадионидаги жавоб ўйини катта эҳтимол билан қор устида бўлиб ўтади. Уни 14:00 дан бошлаб тўғридан-тўғри томоша қилиш мумкин.

Қайд этиш керак, Ўзбекистон Олий Лигасининг сўнгги турини айнан шу стадионда ўтказган «Локомотив» 1:0 ҳисобида зафар қучиб, мамлакат олтин медалларини қўлга киритганди.

Ўзбекистон Кубогининг финал учрашуви 30 ноябрь куни Самарқанд шаҳрида бўлиб ўтади. «Насаф»нинг иккинчи рақиби аниқ бўлмаган ўйин учин чипталар аллақачон савдога чиқарилган.

«Спорт», шунингдек, бугун бўлиб ўтадиган Осиё Чемпионлар Лигасининг финал ўйинини ҳам жонли узатишни режалаштирган. Тошкент вақти билан 19:25 да старт оладиган «Ал-Айн» — «Чонбук Моторс» ўйини тўғридан-тўғри намойиш қилинади.