Россия Олий суди конструктор Михаил Калашниковнинг қариндошларига тегишли «М.Т.Калашников» ёпиқ акциядорлик жамиятининг Интеллектуал ҳуқуқлар бўйича суднинг автоматнинг тасвирий маҳсулот белгиси ҳуқуқий муҳофаза қилинишини муддатидан олдин тўхтатиш ҳақидаги қарорини қайта кўриб чиқиш ҳақидаги сўровини рад этди, деб ёзади «Интерфакс» суд сайтига таяниб.
Нашр эслатишича, 2014 йил июнида «Калашников» концерни «М.Т.Калашников»ни судга бериб, (28-синф бўйича) ўйин автоматлари, ўйинчоқлар, стол ўйинлари ва бошқаларга нисбатан «АК-47» сўзли белгиси бўлган автоматнинг тасвирий маҳсулот белгиси ҳуқуқий муҳофаза қилинишини муддатидан олдин тўхтатишни сўраган эди.
«Роспатент» сайтига жойланган маълумотларга кўра, баҳс олиб борилаётган маҳсулот белгиси даъвогарнинг номига 2004 йил августидан 2022 йил ноябрига қадар рўйхатга олинган. 2013 йил октябрида рўйхатга ўзгартириш киритилди, ҳуқуқ эгалиги жавобгарга ўтди. Талашилаётган белги «АК-47» ёзувли автомат тасвиридан иборат.
Маҳсулот белгиси Товарлар ва хизматлар халқаро классификациясининг 25-синфи (камзуллар, спорт трикотаж буюмлари, курткалар, калта енгли майкалар, тайёр кийим, чарм кийим, трикотаж кийим, бош кийимлар ва ҳоказо) ва 28-синфи бўйича рўйхатга олинган.
2014 йил декабрида суд концерннинг даъвосини қондиришдан бош тортди, чунки «Калашников» концерни ушбу маҳсулот белгисининг ҳуқуқий муҳофаза қилинишини муддатидан олдин тўхтатиб қўйишдан манфаатдорлигини фақат 28-синф маҳсулотларига нисбатан исботлай олди.
2015 йил июнида Интеллектуал ҳуқуқлар бўйича суд президиуми иш бўйича олдинги қарорни бекор қилиб, уни биринчи инстанцияга қайта кўриб чиқиш учун юборди. 2016 йил апрелида «Калашников» концернининг даъвоси тўлиқ қондирилди.
Калашниковнинг қариндошлари Интеллектуал ҳуқуқлар бўйича суд президиумига кассация шикоятини берди, аммо июлда у рад этилди.
Изоҳ (0)