Rossiya Oliy sudi konstruktor Mixail Kalashnikovning qarindoshlariga tegishli “M.T.Kalashnikov” yopiq aksiyadorlik jamiyatining Intellektual huquqlar bo‘yicha sudning avtomatning tasviriy mahsulot belgisi huquqiy muhofaza qilinishini muddatidan oldin to‘xtatish haqidagi qarorini qayta ko‘rib chiqish haqidagi so‘rovini rad etdi, deb yozadi “Interfaks” sud saytiga tayanib.
Nashr eslatishicha, 2014-yil iyunida “Kalashnikov” konserni “M.T.Kalashnikov”ni sudga berib, (28-sinf bo‘yicha) o‘yin avtomatlari, o‘yinchoqlar, stol o‘yinlari va boshqalarga nisbatan “AK-47” so‘zli belgisi bo‘lgan avtomatning tasviriy mahsulot belgisi huquqiy muhofaza qilinishini muddatidan oldin to‘xtatishni so‘ragan edi.
“Rospatent” saytiga joylangan ma’lumotlarga ko‘ra, bahs olib borilayotgan mahsulot belgisi da’vogarning nomiga 2004-yil avgustidan 2022-yil noyabriga qadar ro‘yxatga olingan. 2013-yil oktabrida ro‘yxatga o‘zgartirish kiritildi, huquq egaligi javobgarga o‘tdi. Talashilayotgan belgi “AK-47” yozuvli avtomat tasviridan iborat.
Mahsulot belgisi Tovarlar va xizmatlar xalqaro klassifikatsiyasining 25-sinfi (kamzullar, sport trikotaj buyumlari, kurtkalar, kalta yengli maykalar, tayyor kiyim, charm kiyim, trikotaj kiyim, bosh kiyimlar va hokazo) va 28-sinfi bo‘yicha ro‘yxatga olingan.
2014-yil dekabrida sud konsernning da’vosini qondirishdan bosh tortdi, chunki “Kalashnikov” konserni ushbu mahsulot belgisining huquqiy muhofaza qilinishini muddatidan oldin to‘xtatib qo‘yishdan manfaatdorligini faqat 28-sinf mahsulotlariga nisbatan isbotlay oldi.
2015-yil iyunida Intellektual huquqlar bo‘yicha sud prezidiumi ish bo‘yicha oldingi qarorni bekor qilib, uni birinchi instansiyaga qayta ko‘rib chiqish uchun yubordi. 2016-yil aprelida “Kalashnikov” konsernining da’vosi to‘liq qondirildi.
Kalashnikovning qarindoshlari Intellektual huquqlar bo‘yicha sud prezidiumiga kassatsiya shikoyatini berdi, ammo iyulda u rad etildi.
Izoh (0)