АҚШ президентлигига номзод Ҳиллари Клинтон Вашингтондаги журналистика музейида Американинг Болаларни ҳимоя қилиш жамғармаси йиғинида нутқ сўзлади, деб ёзади TJournal. Бу унинг бир ҳафта аввалги сайловларда мағлуб бўлганидан сўнг омма олдига биринчи марта чиқишидир.
Демократнинг сўзларига кўра, ўтган сайловлар кўпчиликни чуқур ўйга толиб, қадриятларни қайта баҳолашга мажбур қилган. «Ўтган ҳафта ичида кўпчилик ўзига-ўзи Америка ҳақиқатан ҳам биз тасаввур қилгандекми ёки йўқми, деган саволни берганини биламан», — деди у.
Собиқ давлат котиби унга яна телекамералар қаршисида пайдо бўлиш жуда қийин бўлганини тан олди. Сайлов якунлари эълон қилингач эса, у ўзини шунчалик ёмон ҳис қилганки, бошқа ҳеч қачон уйдан чиқмайман, деб ўйлаган.
Шунга қарамай, Клинтон ўз нутқини ижобий кайфиятда якунлади ва тингловчиларни жамиятда пайдо бўлган яққол парчаланишга қарамай, ўз мамлакатига ишонишга ва ҳеч қачон енгилмасликка чақирди.
Изоҳ (0)