«Миллий тикланиш» демократик партиясидан Ўзбекистон Республикаси Президентлигига номзод Сарвар Отамуратовнинг Сурхондарё вилояти сайловчилари билан учрашуви бўлиб ўтди. Тадбир вилоятнинг барча туман ва шаҳарлари сайловчилари билан онлайн видеоконференция орқали мулоқот тарзида бўлиб ўтди. Бу ҳақда «Дарё»га партиянинг вилоят кенгаши ахборот хизмати маълум қилди.
Учрашувни халқ депутатлари Сурхондарё вилоят Кенгашидаги Ўзбекистон «Миллий тикланиш» демократик партияси гуруҳи раҳбари Сайфулло Турсунов очиб берди ва олиб борди. Номзоднинг вилоятдаги ишончли вакили Баҳодир Худойқулов йиғилганларни Сарвар Отамуратов таржимаи ҳоли билан таништирди. Шундан сўнг номзод сайловолди дастурининг асосий йўналишлари юзасидан нутқ сўзлади.
Сарвар Отамуратов таъкидлаганидек, бугун жаҳонда озиқ-овқат хавфсизлигини таъминлаш долзарб аҳамият касб этмоқда. Сайёрада аҳоли сони жадал кўпайиб бораётган бир вақтда, айрим давлатларда бу борада танқислик кузатилаётгани ижтимоий ва сиёсий муаммоларни юзага келтирмоқда. Халқаро ташкилотлар маълумотларига қараганда, бугун дунёда ҳар саккиз одамдан бири тўйиб овқатланиш имкониятига эга эмас.
Қолаверса, атроф-муҳит ифлосланиши давом этмоқда, иқлим ўзгаришларининг салбий оқибатлари яққол кўзга ташланмоқда Қурғоқчилик, сув ресурслари тақчиллиги, турли кимёвий моддаларни тинимсиз ишлатиш натижасида ерларнинг табиий ҳолати йўқолаётгани кузатилмоқда. Ана шу мисолларнинг ўзи мазкур масала нақадар долзарблигини кўрсатади.
Шундан келиб чиқиб, номзод ўз дастурида аҳолининг овқатланиш хилма-хиллигини кенгайтириш, мамлакатда сифатли ва хавфсиз озиқ-овқат маҳсулотлари ишлаб чиқаришни кўпайтириш ва бунда генларни модификация қилиш усулидан фойдаланишни чеклаш каби устувор вазифаларни белгилаган.
Учрашувда номзод дастурининг бошқа йўналишларига ҳам тўхталиб ўтди. Хусусан, хорижий мамлакатлар кутубхона, архив ва музейларида сақланаётган моддий бойликларни Ўзбекистонга қайтариш, оила, мерос, уй-жой даъвоси ва маиший турмуш манбаида туғиладиган низоларни судгача ҳал этиш тизимини ривожлантириш, тарихий шаҳарлар ва очиқ осмон остидаги музейларни қайта таъмирлашга қаратилган йирик лойиҳаларни амалга ошириш, миллий ахборот хавфсизлигини таъминлаш каби бир қатор устувор вазифаларга эътибор қаратди.
Шунингдек, маҳалланинг маънавий-ахлоқий тарбия, янги иш ўринларини яратиш, ижтимоий соҳадаги ишларнинг самарадорлигини ошириш, жойларда жамоат хавфсизлиги ва ҳуқуқ-тартиботни яхшилаш билан боғлиқ масалаларни ҳал этишдаги саъй-ҳаракатларини фаоллаштириш зарурлигини билдирди.
Учрашувда номзод дастурини қўллаб-қувватлаб Ўзбекистон Республикаси Олий Мажлис Сенати аъзоси Ш. Арипова, Денов туманидаги 67-санаторий мактаб-интернати директори Р. Саломова, Ўзбекистон чемпиони Ф. Қосимов ва бошқалар сўзга чиқди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)