“Milliy tiklanish” demokratik partiyasidan O‘zbekiston Respublikasi Prezidentligiga nomzod Sarvar Otamuratovning Surxondaryo viloyati saylovchilari bilan uchrashuvi bo‘lib o‘tdi. Tadbir viloyatning barcha tuman va shaharlari saylovchilari bilan onlayn videokonferensiya orqali muloqot tarzida bo‘lib o‘tdi. Bu haqda “Daryo”ga partiyaning viloyat kengashi axborot xizmati ma’lum qildi.
Uchrashuvni xalq deputatlari Surxondaryo viloyat Kengashidagi O‘zbekiston “Milliy tiklanish” demokratik partiyasi guruhi rahbari Sayfullo Tursunov ochib berdi va olib bordi. Nomzodning viloyatdagi ishonchli vakili Bahodir Xudoyqulov yig‘ilganlarni Sarvar Otamuratov tarjimai holi bilan tanishtirdi. Shundan so‘ng nomzod saylovoldi dasturining asosiy yo‘nalishlari yuzasidan nutq so‘zladi.
Sarvar Otamuratov ta’kidlaganidek, bugun jahonda oziq-ovqat xavfsizligini ta’minlash dolzarb ahamiyat kasb etmoqda. Sayyorada aholi soni jadal ko‘payib borayotgan bir vaqtda, ayrim davlatlarda bu borada tanqislik kuzatilayotgani ijtimoiy va siyosiy muammolarni yuzaga keltirmoqda. Xalqaro tashkilotlar ma’lumotlariga qaraganda, bugun dunyoda har sakkiz odamdan biri to‘yib ovqatlanish imkoniyatiga ega emas.
Qolaversa, atrof-muhit ifloslanishi davom etmoqda, iqlim o‘zgarishlarining salbiy oqibatlari yaqqol ko‘zga tashlanmoqda Qurg‘oqchilik, suv resurslari taqchilligi, turli kimyoviy moddalarni tinimsiz ishlatish natijasida yerlarning tabiiy holati yo‘qolayotgani kuzatilmoqda. Ana shu misollarning o‘zi mazkur masala naqadar dolzarbligini ko‘rsatadi.
Shundan kelib chiqib, nomzod o‘z dasturida aholining ovqatlanish xilma-xilligini kengaytirish, mamlakatda sifatli va xavfsiz oziq-ovqat mahsulotlari ishlab chiqarishni ko‘paytirish va bunda genlarni modifikatsiya qilish usulidan foydalanishni cheklash kabi ustuvor vazifalarni belgilagan.
Uchrashuvda nomzod dasturining boshqa yo‘nalishlariga ham to‘xtalib o‘tdi. Xususan, xorijiy mamlakatlar kutubxona, arxiv va muzeylarida saqlanayotgan moddiy boyliklarni O‘zbekistonga qaytarish, oila, meros, uy-joy da’vosi va maishiy turmush manbaida tug‘iladigan nizolarni sudgacha hal etish tizimini rivojlantirish, tarixiy shaharlar va ochiq osmon ostidagi muzeylarni qayta ta’mirlashga qaratilgan yirik loyihalarni amalga oshirish, milliy axborot xavfsizligini ta’minlash kabi bir qator ustuvor vazifalarga e’tibor qaratdi.
Shuningdek, mahallaning ma’naviy-axloqiy tarbiya, yangi ish o‘rinlarini yaratish, ijtimoiy sohadagi ishlarning samaradorligini oshirish, joylarda jamoat xavfsizligi va huquq-tartibotni yaxshilash bilan bog‘liq masalalarni hal etishdagi sa’y-harakatlarini faollashtirish zarurligini bildirdi.
Uchrashuvda nomzod dasturini qo‘llab-quvvatlab O‘zbekiston Respublikasi Oliy Majlis Senati a’zosi Sh. Aripova, Denov tumanidagi 67-sanatoriy maktab-internati direktori R. Salomova, O‘zbekiston chempioni F. Qosimov va boshqalar so‘zga chiqdi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)