2016 йилги сайлов таклифномаси аввалги йиллардагидан тубдан фарқ қилади

2016 йил 4 декабрь куни бўлиб ўтадиган Ўзбекистон Республикаси Президенти сайловида қатнашиш учун фуқароларга сайлов таклифномаси тарқатилмоқда, деб ёзади ЎзА.

Ўзбекистон Республикаси Марказий сайлов комиссияси котиби Суяржон Қурбонқулов сўзларига кўра, таклифнома Ўзбекистон Республикаси Марказий сайлов комиссиясининг 2016 йил 28 октябрдаги «Ўзбекистон Республикаси Президенти сайловига доир таклифноманинг намунаси ва унинг таснифини тасдиқлаш тўғрисида»ги қарорига мувофиқ чоп этилди.

Сайловга таклифнома аввалги йилларда чиқарилган таклифномалардан тубдан фарқ қилади. Эътиборли жиҳати, унда ҳар бир сайловчининг шахсан овоз беришига оид қонун нормасидан кўчирма келтирилгани ҳар бир сайловчини ўз ҳуқуқидан фойдаланишга даъват этиши шубҳасиз. Сиёсий партиялардан кўрсатилган номзодларга оид маълумотлар ҳам илк бор сайлов таклифномасидан ўрин олган.

Сайлов таклифномасининг аниқ таснифига тўхталадиган бўлсак, Ўзбекистон Республикаси Президенти сайловига таклифнома A5 форматидаги қоғозга олди ва орқа тарафига рангли бўёқлар билан чоп этиш орқали нашр этилган. Қоғознинг олд тарафи пастки қисмида ҳаворанг нақшли фоннинг марказида Ўзбекистон Республикаси Марказий сайлов комиссиясининг тимсоли (эмблемаси), унинг тагида катта босма ҳарфлар билан «САЙЛОВГA ТАКЛИФНОМА» сўзлари битилган. Ундан икки поғона пастда сайлов бўлиб ўтадиган йил, кун ва ой санаси ёзма равишда ҳамда унинг пастида катта босма ҳарфлар билан «ЎЗБЕКИСТОН РЕСПУБЛИКAСИ ПРЕЗИДЕНТИ САЙЛОВИ КУНИ» деган сўзлар ёзилган.

Қоғознинг орқа тарафи нақшинкор ҳошияларга бўлинган. Нақшинкор ҳошияларнинг тўртта бурчагида тўртта учбурчак шаклида миллий нақш намунаси акс эттирилган ва улар икки қатор чизиқлар билар ўзаро бирлаштирилган.

Юқори нақшинкор ҳошиянинг ички қисмида «Участка сайлов комиссияси Сизни 2016 йил 4 декабрь куни ўз конституциявий ҳуқуқингиздан фойдаланишга – Ўзбекистон Республикаси Президенти сайловида иштирок этишга таклиф қилади» матни тўқ ҳаворанг рангда битилган.

«Ўзбекистон Республикаси Президенти сайлови тўғрисида»ги Ўзбекистон Республикаси Қонунининг 31-моддасига мувофиқ, ҳар бир сайловчи шахсан овоз беради, бошқа кишилар учун овоз беришга йўл қўйилмайди» сўзлари ёзилган.

Пастки нақшинкор ҳошияларнинг ички қисмида имзо варақасини Марказий сайлов комиссиясига топшириш навбатига қараб, тартиб билан партиянинг номи ва унинг тимсоли ҳамда партия томонидан кўрсатилган Президентликка номзоднинг фамилияси, исми, отасининг исми жойлаштирилган.

2016 йил 4 декабрь куни бўлиб ўтадиган Ўзбекистон Республикаси Президенти сайловида мамлакатнинг 21,4 миллиондан зиёд фуқароси иштирок этади. Шу кунларда уларга сайлов таклифномаси тарқатилмоқда.