НАТО раҳбарияти АҚШдаги сайловларда Дональд Трамп ғолиб чиққани муносабати билан, саммитни кейинга қолдиришга қарор қилди, деб ёзади «РБК». Брюсселдагилар янги президент альянсга нисбатан сиёсатни ўзгартиришидан хавфсирамоқда.
Германиянинг Spiegel нашри НАТО бош котиби Йенс Столтенбергга яқин манбаларига таяниб хабар беришича, баҳорга режалаштирилган саммит ёзга кўчирилади. Бу вақтгача альянс раҳбарияти АҚШнинг янги президенти Дональд Трампнинг ҳарбий ташкилотга муносабати қандай бўлишини тушуниб олмоқчи.
НАТО АҚШнинг альянс фаолиятидаги ролини анча камайтирадиган сценарийни кўриб чиқмоқда. Хусусан, бунда гап АҚШнинг Шарқий Европа мамлакатларига қўшимча бўлинмаларни юборишдан бош тортиши, шунингдек, Европа ҳудудидаги Америка ҳарбий контингентининг умумий қисқартирилиши ҳақида бориши мумкин.
Нашр эслатишича, шу йилнинг июлида Дональд Трамп НАТОга аъзо мамлакатлар учун хавфсизлик кафолатини автоматик тарзда узайтиришга розилик беришини гумон остига олган эди. Апрелда эса НАТОнинг тарқалиб кетиши эҳтимолини нормал ҳолат деб атаган эди.
Изоҳ (0)