АҚШ президенти сайловида республикачи Дональд Трамп ғалаба қозонди. Сайловнинг дастлабки натижалари эълон қилинганидан сўнг, бутун сайловолди кампанияси давомида ўзининг можароли баёнотлари билан партия раҳбариятини ғазаблантириб келган номзод мамлакатни бирлаштириш ҳақида нутқ ирод қилди. «Дарё» Трампнинг ярашувчанлик руҳидаги нутқи таржимасини бироз қисқартиришлар билан эълон қилади (Meduza’га асосланиб).
Раҳмат. Ҳар бирингизга катта раҳмат. Сизларни кутишга мажбур қилганим учун узр.
Ҳозиргина давлат котиби Клинтон қўнғироқ қилди (Ҳиллари Клинтон 2009—2013 йилларда АҚШ давлат котиби лавозимида ишлаган; Америка қадриятларига кўра, юқори мартабали шахслар давлат хизматидан кетганидан кейин ҳам ўша лавозими бўйича чақирилаверади — «Дарё»). У бизни табриклади. Айнан бизни. У бизни ғалабамиз билан табриклади ва мен ҳам уни, унинг оиласини жуда, жуда қизғин сайлов кампанияси билан табрикладим. У муносиб кураш олиб борганини таъкидлашни истардим. Ҳиллари жуда узоқ вақт давомида ва сидқидилдан ишлади ҳамда мамлакат олдидаги хизматлари учун барчамиз ундан қарздормиз. Мен чин кўнгилдан шундай деб ҳисоблайман. Энди Америка учун ажралишдан қолган яраларни даволаб, бирлашиш вақти келди. Мамлакатдаги барча республикачилар, демократлар ва мустақил номзодларнинг тарафдорларига айтяпман, ягона халқ сифатида бирлашадиган вақтимиз келди.
Мамлакатимизнинг ҳар бир фуқаросига ваъда бераманки, мен барча америкаликларга президент бўламан ва бу мен учун жуда муҳим. Аввал мени қўллаб-қувватламасликка қарор қилганлар, улар етарлича эди, — буюк мамлакатимизни бирлаштириш ва биргаликда ишлаш учун маслаҳат ва ёрдамингизни сўраб сизга мурожаат этаман. Бошида айтганимдек, бизда кампания бўлгани йўқ, бизда ўз мамлакатини севадиган ҳамда ўзи ва оиласи учун яхшироқ, ёрқинроқ келажакни хоҳлаётган миллионлаб меҳнацевар эркаклар ва аёлларни жамлаган ақлбовар қилмас ва буюк ҳаракат пайдо бўлди.
Бу ҳаракат барча ирқ, барча диндаги, келиб чиқиши турлича ва эътиқоди ҳар хил бўлган америкаликларни бирлаштирди. Ҳукуматимиз одамларга хизмат қилишини кутаётган ва хоҳлаётганлар, у сизга хизмат қилади. Биргаликда биз миллатимизни ва «Америка орзуси»ни уйғотиш билан боғлиқ шошилинч вазифани бажаришга киришамиз.
Мен ҳаётимни бизнес билан шуғулланиб, бутун дунё бўйлаб лойиҳалар ва одамларнинг рўёбга чиқарилмаган салоҳиятларини ўрганиш билан ўтказганман. Энди мен бу ишни мамлакатимиз учун қилмоқчиман. Мамлакатимизда ақлбовар қилмас салоҳият бор. Менда мамлакатимизни яхшилаб ўрганиш бўйича имконият бўлган. Ақлбовар қилмас салоҳият бор. Ҳар бир америкалик эркак ва аёл ўз салоҳиятини тўлиқ рўёбга чиқариш имконига эга бўлади. Мамлакатимиз эркак ва аёлларини энди сира ёддан чиқаришмайди.
Биз шаҳарларимизни қайта тиклаб, йўллар, кўприклар, тоннеллар, аэропортлар, мактаб ва шифохоналарни қайта қурамиз. Биз инфратузилмаларимизни қайта тиклаймиз, уларнинг тенгсиз бўлади ва миллионлаб одамларни иш билан таъминлаймиз. Шунингдек, бизнинг ажойиб, шундай садоқатли фахрийларимиз ҳақида ҳам қайғурамиз. Ўтган 18 ой давомида уларнинг кўплари билан танишдим, кампания давомида улар билан бирга шунча вақтни ўтказиш мен учун катта шараф бўлди. Бизнинг фахрийларимиз — ақлбовар қилмас инсонлардир.
Биз миллий ўсиш ва қайта тикланиш йўли бўйлаб саёҳатга отланамиз. Мен одамларимизнинг истеъдодларидан фойдаланаман ҳамда биз энг яхши ва ёрқин инсонларни ўзининг ақлбовар қилмас иқтидорини умумий наф учун йўналтиришга чақирамиз. Шундай бўлади ҳам. Бизда аъло даражадаги иқтисодий режа бор. Биз иқтисодий ўсишни икки баробар оширамиз ва жаҳондаги энг қудратли иқтисодиётга эга бўламиз. Айни вақтда, биз бошқа халқлар билан — биз билан ҳамкорлик қилишни хоҳлаганлар билан алоқалар ўрнатамиз. Бизда аъло муносабатлар бўлади. Муносабатларимиз аъло, жуда аъло бўлади, деб кутмоқдамиз. Ҳеч бир орзу ҳаддан ташқари катта, ҳеч бир чорлов ҳаддан ташқари жиддий деб ҳисобланиши мумкин эмас. Келажагимиз учун қилмоқчи бўлаётган ишларимизнинг ҳеч бири уддалаб бўлмайдиган вазифа эмас.
Америка энди ҳеч қачон энг яхшисидан бошқасига рози бўлмайди. Биз мамлакатимизга унинг асл қисматини қайтаришимиз ҳамда қўрқмасдан катта ва дадил орзу қилишимиз керак. Биз буни уддалашимиз зарур. Биз мамлакатимиз ҳақида, ажойиб нарсалар ҳақида, муваффақият ҳақида орзу қиламиз.
Мен жаҳон ҳамжамиятига мурожаат қилиб айтмоқчиманки, биз Америка манфаатларини энг юксакка қўямиз, бироқ ҳар нарсага — барча одамлар ва барча халқларга адолат билан ёндашамиз. Биз хусумат эмас, муроса йўлини; низо эмас, ҳамкорликни излаймиз.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)