AQSh prezidenti saylovida respublikachi Donald Tramp g‘alaba qozondi. Saylovning dastlabki natijalari e’lon qilinganidan so‘ng, butun saylovoldi kampaniyasi davomida o‘zining mojaroli bayonotlari bilan partiya rahbariyatini g‘azablantirib kelgan nomzod mamlakatni birlashtirish haqida nutq irod qildi. “Daryo” Trampning yarashuvchanlik ruhidagi nutqi tarjimasini biroz qisqartirishlar bilan e’lon qiladi (Meduza’ga asoslanib).
Rahmat. Har biringizga katta rahmat. Sizlarni kutishga majbur qilganim uchun uzr.
Hozirgina davlat kotibi Klinton qo‘ng‘iroq qildi (Hillari Klinton 2009—2013-yillarda AQSh davlat kotibi lavozimida ishlagan; Amerika qadriyatlariga ko‘ra, yuqori martabali shaxslar davlat xizmatidan ketganidan keyin ham o‘sha lavozimi bo‘yicha chaqirilaveradi — “Daryo”). U bizni tabrikladi. Aynan bizni. U bizni g‘alabamiz bilan tabrikladi va men ham uni, uning oilasini juda, juda qizg‘in saylov kampaniyasi bilan tabrikladim. U munosib kurash olib borganini ta’kidlashni istardim. Hillari juda uzoq vaqt davomida va sidqidildan ishladi hamda mamlakat oldidagi xizmatlari uchun barchamiz undan qarzdormiz. Men chin ko‘ngildan shunday deb hisoblayman. Endi Amerika uchun ajralishdan qolgan yaralarni davolab, birlashish vaqti keldi. Mamlakatdagi barcha respublikachilar, demokratlar va mustaqil nomzodlarning tarafdorlariga aytyapman, yagona xalq sifatida birlashadigan vaqtimiz keldi.
Mamlakatimizning har bir fuqarosiga va’da beramanki, men barcha amerikaliklarga prezident bo‘laman va bu men uchun juda muhim. Avval meni qo‘llab-quvvatlamaslikka qaror qilganlar, ular yetarlicha edi, — buyuk mamlakatimizni birlashtirish va birgalikda ishlash uchun maslahat va yordamingizni so‘rab sizga murojaat etaman. Boshida aytganimdek, bizda kampaniya bo‘lgani yo‘q, bizda o‘z mamlakatini sevadigan hamda o‘zi va oilasi uchun yaxshiroq, yorqinroq kelajakni xohlayotgan millionlab mehnatsevar erkaklar va ayollarni jamlagan aqlbovar qilmas va buyuk harakat paydo bo‘ldi.
Bu harakat barcha irq, barcha dindagi, kelib chiqishi turlicha va e’tiqodi har xil bo‘lgan amerikaliklarni birlashtirdi. Hukumatimiz odamlarga xizmat qilishini kutayotgan va xohlayotganlar, u sizga xizmat qiladi. Birgalikda biz millatimizni va “Amerika orzusi”ni uyg‘otish bilan bog‘liq shoshilinch vazifani bajarishga kirishamiz.
Men hayotimni biznes bilan shug‘ullanib, butun dunyo bo‘ylab loyihalar va odamlarning ro‘yobga chiqarilmagan salohiyatlarini o‘rganish bilan o‘tkazganman. Endi men bu ishni mamlakatimiz uchun qilmoqchiman. Mamlakatimizda aqlbovar qilmas salohiyat bor. Menda mamlakatimizni yaxshilab o‘rganish bo‘yicha imkoniyat bo‘lgan. Aqlbovar qilmas salohiyat bor. Har bir amerikalik erkak va ayol o‘z salohiyatini to‘liq ro‘yobga chiqarish imkoniga ega bo‘ladi. Mamlakatimiz erkak va ayollarini endi sira yoddan chiqarishmaydi.
Biz shaharlarimizni qayta tiklab, yo‘llar, ko‘priklar, tonnellar, aeroportlar, maktab va shifoxonalarni qayta quramiz. Biz infratuzilmalarimizni qayta tiklaymiz, ularning tengsiz bo‘ladi va millionlab odamlarni ish bilan ta’minlaymiz. Shuningdek, bizning ajoyib, shunday sadoqatli faxriylarimiz haqida ham qayg‘uramiz. O‘tgan 18 oy davomida ularning ko‘plari bilan tanishdim, kampaniya davomida ular bilan birga shuncha vaqtni o‘tkazish men uchun katta sharaf bo‘ldi. Bizning faxriylarimiz — aqlbovar qilmas insonlardir.
Biz milliy o‘sish va qayta tiklanish yo‘li bo‘ylab sayohatga otlanamiz. Men odamlarimizning iste’dodlaridan foydalanaman hamda biz eng yaxshi va yorqin insonlarni o‘zining aqlbovar qilmas iqtidorini umumiy naf uchun yo‘naltirishga chaqiramiz. Shunday bo‘ladi ham. Bizda a’lo darajadagi iqtisodiy reja bor. Biz iqtisodiy o‘sishni ikki barobar oshiramiz va jahondagi eng qudratli iqtisodiyotga ega bo‘lamiz. Ayni vaqtda, biz boshqa xalqlar bilan — biz bilan hamkorlik qilishni xohlaganlar bilan aloqalar o‘rnatamiz. Bizda a’lo munosabatlar bo‘ladi. Munosabatlarimiz a’lo, juda a’lo bo‘ladi, deb kutmoqdamiz. Hech bir orzu haddan tashqari katta, hech bir chorlov haddan tashqari jiddiy deb hisoblanishi mumkin emas. Kelajagimiz uchun qilmoqchi bo‘layotgan ishlarimizning hech biri uddalab bo‘lmaydigan vazifa emas.
Amerika endi hech qachon eng yaxshisidan boshqasiga rozi bo‘lmaydi. Biz mamlakatimizga uning asl qismatini qaytarishimiz hamda qo‘rqmasdan katta va dadil orzu qilishimiz kerak. Biz buni uddalashimiz zarur. Biz mamlakatimiz haqida, ajoyib narsalar haqida, muvaffaqiyat haqida orzu qilamiz.
Men jahon hamjamiyatiga murojaat qilib aytmoqchimanki, biz Amerika manfaatlarini eng yuksakka qo‘yamiz, biroq har narsaga — barcha odamlar va barcha xalqlarga adolat bilan yondashamiz. Biz xusumat emas, murosa yo‘lini; nizo emas, hamkorlikni izlaymiz.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)