Россиянинг Воронеж шаҳрида истиқомат қилувчи 32 ёшли Андрей Соловьёв Ёқутистон шимолидаги Лабинқир кўли бўйидаги уйчада 100 кун яшади. Экстремал сафарга алоқа воситаси, иссиқ кийим ва озиқ-овқат олмаган, деб хабар беради TJournal.
Соловьёв яшаб турган уйга энг яқин аҳолижой 100 километр нарида жойлашган. Унинг тақдирига қизиқиб қолган Россия география жамияти Оймякон бўлими ходимлари экстремал билан суҳбат қурди. Суҳбатда Соловьёв нега бу ерга келганини айтди.
«Биринчидан, бу Лабинқир феномени: кўл жуда ғаройиб. Мени бу ерда Лабинқир жини яшаши ҳақидаги афсона қизиқтириб қўйди, уни кўплар кўрган экан. Иккинчидан, ўзимнинг яшаб қолиш кўникмаларимни текшириб кўрмоқчи эдим, негаки мен туризм ва яшаб қолиш бўйича инструкторман», — деди сайёҳ.
У Томтор қишлоғидан Лабинқиргача бўлган 325 километр масофани 10 кунда босиб ўтди. Сайёҳ ўзи билан олиб келган 70 килограмм юкни иккига бўлиб манзилга олиб келди.
Шунингдек, Соловьёв ўзи билан озиқ-овқат захиралари ва иссиқ кийим олмаганини, лекин Ёқутистонда унга мўйнали куртка совға қилинганини айтди. Экстремал балиқ, реза мева ва ўт-ўланлар билан озиқланмоқда.
«Эрталаб соат олтида тураман. Муз қопламагунга қадар кўлда чўмилар ёки челакдан устимга сув қуяр эдим, ҳозир эса баданимга қор ишқалайман. Пешингача ўтин тайёрлайман, сўнг балиқ тушган-тушмаганини текшираман. Шундан сўнг кўл атрофини айланаман, баъзан тоғларга чиқаман. Атрофда кўп сайр қиламан, беш-етти километр йўл босаман, узоққа кетмайман», — ҳикоя қилади сайёҳ.
Соловьёв ўзи билан милтиқ олмаган эди, аммо яқин атрофда бир неча марта йиртқич жониворларни учратди. Жумладан, сайёҳ 200 килограмм вазнлик айиқни учратгани ҳақида ҳикоя қилиб берди.
Экстремал Лабинқирда баҳоргача қолишни режалаштирмоқда.
Изоҳ (0)