Rossiyaning Voronej shahrida istiqomat qiluvchi 32 yoshli Andrey Solovyov Yoqutiston shimolidagi Labinqir ko‘li bo‘yidagi uychada 100 kun yashadi. Ekstremal safarga aloqa vositasi, issiq kiyim va oziq-ovqat olmagan, deb xabar beradi TJournal.
Solovyov yashab turgan uyga eng yaqin aholijoy 100 kilometr narida joylashgan. Uning taqdiriga qiziqib qolgan Rossiya geografiya jamiyati Oymyakon bo‘limi xodimlari ekstremal bilan suhbat qurdi. Suhbatda Solovyov nega bu yerga kelganini aytdi.
“Birinchidan, bu Labinqir fenomeni: ko‘l juda g‘aroyib. Meni bu yerda Labinqir jini yashashi haqidagi afsona qiziqtirib qo‘ydi, uni ko‘plar ko‘rgan ekan. Ikkinchidan, o‘zimning yashab qolish ko‘nikmalarimni tekshirib ko‘rmoqchi edim, negaki men turizm va yashab qolish bo‘yicha instruktorman”, — dedi sayyoh.
U Tomtor qishlog‘idan Labinqirgacha bo‘lgan 325 kilometr masofani 10 kunda bosib o‘tdi. Sayyoh o‘zi bilan olib kelgan 70 kilogramm yukni ikkiga bo‘lib manzilga olib keldi.
Shuningdek, Solovyov o‘zi bilan oziq-ovqat zaxiralari va issiq kiyim olmaganini, lekin Yoqutistonda unga mo‘ynali kurtka sovg‘a qilinganini aytdi. Ekstremal baliq, reza meva va o‘t-o‘lanlar bilan oziqlanmoqda.
“Ertalab soat oltida turaman. Muz qoplamagunga qadar ko‘lda cho‘milar yoki chelakdan ustimga suv quyar edim, hozir esa badanimga qor ishqalayman. Peshingacha o‘tin tayyorlayman, so‘ng baliq tushgan-tushmaganini tekshiraman. Shundan so‘ng ko‘l atrofini aylanaman, ba’zan tog‘larga chiqaman. Atrofda ko‘p sayr qilaman, besh-yetti kilometr yo‘l bosaman, uzoqqa ketmayman”, — hikoya qiladi sayyoh.
Solovyov o‘zi bilan miltiq olmagan edi, ammo yaqin atrofda bir necha marta yirtqich jonivorlarni uchratdi. Jumladan, sayyoh 200 kilogramm vaznlik ayiqni uchratgani haqida hikoya qilib berdi.
Ekstremal Labinqirda bahorgacha qolishni rejalashtirmoqda.
Izoh (0)